何超蓮早前被爆將會喺4月同男友竇驍喺峇里舉行世界婚禮,雖然兩位當事人都冇回應,但係蔡卓妍早前就話喺巴黎撞到超蓮時,已經間接咁恭喜咗對方。雖然未知超蓮下月係咪會披嫁衣,但呢日佢就着上簡潔嘅白色吊條連身裙,現身廣州一個活動,佢仲同大家分享打扮心得。至於同場嘅任嘉倫就分享自己同廣州嘅淵源,仲話出活動前,有特別睇下會唔會經過以前自己成日去嘅地方呀。