/public/article/images/202303/63cda566-0376-4286-bd0f-306994f407d6.jpg)
杜如風（Helen）素有「日本旅遊達人」之稱，潮物觸覺敏銳，近日為J2（82 台）主持旅遊節目《解風東京》，一連三星期跟大家分享東京至潮至抵至正新鮮事，逢周一至五晚十點半 J2（82 台）播出。
前晚（14 日）第 7 集繼續精彩，杜如風全力介紹中目黑區，節目開始先去醫肚，幫襯 Onigily Café 的即叫即整飯糰，米飯粒粒分明，便利店嘅機製出品冇得比，白米控觀眾真係要試下，食飽之後杜如風開始「濕平」強項，來到 Nigel Cabourn The Army Gym，主打係軍服亦有工人服。有件仿製當年南極探險隊攝影師嘅外套，盛惠約 1 萬港元左右， 杜如風鬼馬同工作人員講︰「呢件褸犀利喇，啱晒你同你（指住正在拍攝嘅兩位攝影師）。」杜如風接住話外套嘅設計同軍服相似︰「啲扣可以剝得好快，呢個除男人嘅衫就啱喇……狼虎之年呀，嚟喇！Come on！」要配埋動作，非常搞笑。
遊日本點可以唔食拉麵，今集尾聲杜如風介紹一間隱世拉麵店Ramen Break Beats，係東京10間最高分拉麵店之一，主打醬油湯底，售價一點都唔貴，1,000円至2,000円（約59港元至118港元）一碗，絕對平過香港。師傅由淥麵到放料整個過程非常優雅。杜如風點特上醬油拉麵，配料除咗拉麵必備嘅叉燒之外，仲有鴨肉片、 雲吞、白肉、雞胸肉同半熟蛋。食完第一啖，杜如風已直豎拇指，一句「唔使講嘢吖」，代表非常好味。 
噚晚（15 日）杜如風同大家去墨田區押上，試無接觸迴轉壽司，一件大toro（吞拿魚）係賣132円（約7.8港元）、一碟海膽壽司賣290円（約17港元）。食飽飽之後仲有抽獎，只要客人將碟放入機，每5隻便有一次抽獎機會，有得食有得玩。杜如風帶住攝製隊提供2,000円（約117港元），到下町人情商店街掃街。佢先買咗一盒六粒可樂餅收費300円（17.6 港元），之後又睇中一個成塊面般大嘅栗子包，只是180円（約10.5港元），杜如風大讚好好食又夠平，呢個size食完頂 到一餐，推薦嚟到日本shopping冇晒錢可以買嚟食，之後佢幫襯串燒店，食90円（約5.3港元）一串串燒非常好味，吸引到全crew人幫襯，杜如風盛讚醬汁惹味，掃街最後一 站係350円（約20.5港元） 6 粒嘅章魚燒店，好食不在話下，重點係老闆娘估杜如風只係30歲上下，令佢喜出望外。
一行人食飽後慢步到隅田川嘅新打卡位戀人橋，仿照法國心鎖橋，有戀人聖地之稱， 情侶可以買一把鎖，寫上二人名字然後扣喺橋上，鎖住愛情。導演事前已為杜如風準備道具，不過size出咗啲問題，鎖變成單車鎖，比較特別。眾所周知杜如風極度迷戀梁朝偉，二話不說即喺把鎖寫上「梁朝偉」，另一邊寫自己名字，扣完之後仲加多句 「鎖到咁實仲唔掂……梁朝偉我愛你，一生一世」。梁朝偉喺毫不知情之下，再次「被客串」 演出。 
今晚（16 日）去大家非常熟悉嘅涉谷嘅八千公石像、十字路口萬人空巷嘅斑馬線，今次新景點仲有涉谷區立宮下公園，行到腳軟可以到此一遊稍作休息。而且不單止有得坐，樓高幾層嘅公園，依然有得食有得買。園內除咗一般設施，天台仲有多啦A夢同大雄嘅打卡位。就近涉谷橫町食街，裏外設計係仿照昭和時期建設，內有20間餐廳，分別嚐到日本不同地區食物，包括九州、四國、沖繩等，又可以坐低歎杯飲品，感受一下昭和時期嘅氛圍。 杜如風轉眼間又帶大家去行街，已去到一間有60年歷史、主打DIY牛仔產品嘅工場，客人可挑選心儀服飾，釘上自己揀選嘅鈕扣及名牌，變成獨一無二自家品牌，杜如風揀咗牛仔褸，自選衫鈕同加工，原本價值24,000円（約 1,400港元）嘅褸，喺Helen DIY同着過上身加持後，已經升值不少，更重要係杜如風將於明晚（17號） 9 點半，喺IG的J2 page開live，即場送出呢件牛仔褸，當然唔可以錯過。
《解風東京》逢周一至五晚 10 點半 J2（82 台）播映
