隱形戰隊丨許家傑生劏葉蒨文取心臟報復 情深「送水輝」轉型兇殘 Big Boss

TVB熱播劇《隱形戰隊》噚晚（15號）及今晚嗰集圍繞「黑心殺人換心」 案，劇情講述Cool Sir 昔日警隊戰友兼好友凌毅（許家傑飾），自未婚妻Fanny（謝文欣飾）遇車禍身亡後失聯兼退出警隊，原來一直獨自追查Fanny身亡真相。幾經轉折，凌毅查出當年周昌盛（杜燕歌飾）為咗救病危女兒周曉悅（葉蒨文飾），竟然買兇殺死Fanny並奪取其心臟為女兒作移植手術。得悉真相後大受刺激嘅凌毅，理智盡失綁走周曉悅，並揚言要喺周昌盛面前直播生劏周曉悅奪回Fanny心臟，睇到網民好緊張。

憑《愛‧回家之開心速遞》「送水輝」一角備受關注嘅許家傑，今次喺《隱形》雖然飾演遊走殺人犯邊緣嘅「奸角」，由於本性熱血善良、對未婚妻情深專一，劇情反轉再反轉後更驚變受害者，獲取不少網民同情，除咗直指凌毅本性唔壞、故事感人，仲讚許家傑可塑性高：「送水輝做呢種要復仇嘅角色幾好睇。」其實前晚許家傑甫出場，已喺網絡引發熱議，獲讚身手了得，更有人留言支持佢喺《隱形戰隊》幹一番大事。

羅孝勇噚晚演出亦贏盡好評，尤其𨋢內槍戰一幕，劇情講述Ocean（馬國明飾）與Madam Q（唐詩詠飾）喺醫院追趕受昌盛所託向已傷重嘅林偉樑（林景程飾）下毒手嘅殺手陳環（羅孝勇飾），二人追進𨋢內後先與陳環來個眼神對峙，之後陳環一手掀起被單、一手掹槍射向 Ocean，Ocean 則身手敏捷地還拖，結果兩位男角同時獲讚有型有款，而製作方面則獲讚拍得細緻精彩。

呢次羅孝勇繼《法證先鋒V》由「暖男」黑幫大佬，到演繹型格冷血殺手再獲好評，所有動作場面表現得有型有款，難怪監製文偉鴻亦大讚從未見過咁有型嘅羅孝勇。對於獲監製讚有型，羅孝勇受訪時謙稱謂：「我十分多謝監製同拍攝團隊對我嘅幫忙同照顧，亦都好多謝武師同我一齊分析動作上點樣可以配合鏡頭打得更好睇。今次好難得，因為終於可以拍到自己好鍾意嘅動作戲，我亦都覺得係緣份，因為咁啱我參加完《明星運動會》拳擊賽攞咗冠軍（註：《明星運動會前哨戰：Fight 盡》），當時為咗個比賽我都操練咗好一段時間，所以無論 體格定精神上都比較 ready 去拍打戲。」

談到大獲好評的𨋢內槍戰，羅孝勇謂： 「其實呢場戲有個難處，因為我件護士衫係短袖，手臂唔可以加保護墊，真係所 有打鬥場面都要硬頂，但為求有真實感，我都豁出去希望盡力做好，最後喺唔係 好多Take之下順利完成。不過返到屋企兩隻手臂其實瘀晒，依家睇返原來大家咁鍾意呢場戲，咩都值得啦。」

昨晚亦有「新人」彈出搶鏡，之前喺《超能使者》飾演被迫賣肉嘅葉蒨文，呢次飾演天真善良嘅千金，不單止噚晚被綁一幕睇到觀眾肉緊，其青春無敵嘅打網球造型亦贏盡正評，被指上位指日可待：「捧吓葉蒨文咪幾好，後 生靚女身材又好」。至於前輩級唐詩詠亦不輸蝕，見佢操Gym 一幕獲讚身形fit爆，擁有完美蛇腰，成功搶鏡不讓「師妹」們專美。

《隱形戰隊》逢周一至五晚八點半翡翠台播映