劉浩龍呢日舉行記者會，宣傳成立個人工作室兼推出新歌，工作室合伙人林盛斌同MV女主角陳欣妍都有到場支持。而師兄喺圈中嘅好友謝霆鋒、蘇永康、鄭希怡、梁漢文、姜皓文同郭偉亮都有拍片祝賀。

雖然工作室先啱啱成立，但師兄已經滿腹大計，除咗嚟緊會拍劇同出EP外，11月又會開騷同歌迷見面。講到之前邀請好友側田上佢同Eric Kwok主持節目，但對方疑因為飲醉酒而狂串師兄，惹嚟網民批評佢冇品，呢日師兄亮開腔回應，話多謝側田無條件咁上佢哋個節目，師兄話明白網民睇完點解會有呢個反應，但師兄話其實Eric想呈現佢同側田有幾老友，仲話平時喺屋企玩嗰陣就係咁，至於被網民讚EQ高，師兄就話唔係自己EQ特別高，只係佢同側田相處十幾年嚟，平日都係大家互寸吓呀。

同師兄相識20年嘅Bob，被問到被喻為圈中金牌媒人嘅佢，會唔會竹師兄搵返個另一半？Bob就話近幾年都有keep住send啲女仔相畀對方，但係奈何對方專注事業拒絕去同啲女仔約會呀。