今個星期日《中年好聲音》繼續下半場「爭入十強！次回合生死鬥！」，出場名單包括林鉫徫《好人》、吳大強 《Killing Me Softly》、李佳《我只在乎你》、龍婷《飄洋過海來看你》、涂家堯《我們》、曹敏寶《P.S.我愛你》。

今集嘅六位出戰選手，同上集六位一樣，將分享各自要面對嘅人生課題，當中最令人期待嘅，當然係熱門吳大強分享嘅人生故事喇，不過令人意外嘅係，吳大強選擇分享嘅竟然係少男十五二十時嘅愛情經！原來大強年青時曾被一名在街頭表演嘅「如花少女」吸引，可惜因為冇勇氣搭訕，以致「飲恨」至今。

吳大強被指今次表演感情欠奉

為咗懷緬當年嘅青澀，大強選唱《Killing Me Softly》向呢位回憶中嘅美少女憑歌寄意：「女仔十八一朵花，係好吸引好靚，但當時都係細個啦，未有勇氣結識佢，機會過去咗就冇，好多時人生就係咁，你冇勇氣踏出一步，就做唔到當時個心想做嘅嘢。」

佢又話自己經常教四子要抓緊機會：「唔係淨係對女士，任何事情一有機會， 你覺得有益就應該即刻去做，寧願試過都唔好錯過。」 呢集佢繼續大晒「療愈系」唱功，不過就出現唔少負評，當中以 Eric Kwok 嘅評語最為兇狠，仲指整首歌變化欠奉：「我用咗肥媽嗰招，就係攞嘢食（肥媽在旁即作狀喊打），如果我攞嘢食，即係你冇fully capture我attention，咁我真係攞咗兩次嘢食。我唔係好feel 到你諗緊個女仔，我淨係feel 到你唱緊隻歌。」到底大強會唔會因為呢次表現而大熱倒灶呢？

正當呢邊大強被指「唔夠感情」，另一邊廂林鉫徫同涂家堯就感情滿瀉，佢哋仲不約而同唱到眼濕濕含淚收場。經常被標籤為「男人婆」嘅鉫徫，接受製作組深度訪問時已忍唔住哽咽：「睇完（網上評語）我都要啲時間去消化，通常話我肥，或者唔知我係男定女，或者合唱時會覺得我係唱得好，不過話唔想睇到個畫面。」

而林鉫徫就獲讚唱出真感情

雖然備受攻擊，不過鉫徫依然希望維持樂觀：「我揀呢首歌係想提醒自己要繼續保持善良，亦都希望可以將個重心放喺自己度，唔再理人哋嘅目光。」至於家堯就大方分享當年離婚點滴：「本身我唔想離婚，但當時佢(前妻)話我浪費咗佢六年時間，聽到我覺得冇乜挽回嘅餘地」，家堯仲話為咗避免家人擔心，度過一段難熬嘅日子。製作組仲請咗涂媽媽分享對兒子離婚一事嘅睇法。

涂家堯回想破裂婚姻不禁落淚

用真摯感情獻唱嘅佢哋，表演後同時獲得評判讚許，其中張佳添大讚鉫徫終於有「追聽性」：「不嬲知你唱得，但今日最開心係我開始聽到你嘅力量冇乜壓迫感，之前你係好唱得，但有 壓迫感，去到後面會覺得夠喇，但今日聽到後面會好enjoy。」

而家堯就獲得「閹尖達人」伍仲衡好評：「你感動到我，因為成首歌你係用真誠唱出嚟，冇話要用任何技巧，當然喺技巧上係有啲沙石嘅。我特別鍾意你個verse，你好似喺我耳仔旁邊細細聲同我講嘢…」

評判們喺今次十強戰似乎幾有喜好，最好邊位參賽者被淘汰記得留意節目播出

《中年好聲音》星期日晚 20:30 翡翠台

TVB歌唱真人騷《中年好聲音》10強選手，呢個星期要揀「輝黃金曲」出戰，是集歌單為吳大強《L.O.V.E.》、丁文俊《網中人》、李佳《上海灘》、顏志恒《摘星》、龍婷《焚心以火》、涂家堯《當年情》、林鉫徫《問我》、羅啟豪《奮鬥》、支嚳儀《愛定你一個》及周吉佩《畫出彩虹》。

吳大強因手慢未能挑選心水歌《上海灘》，手速輸咗畀後輩，原來周吉佩都唔夠手快，佢被顏志恒搶心水歌曲，周吉佩自認揀歌好差，希望改編歌曲《畫出彩虹》想出奇制勝，而顏志恒則想找一位能駕馭嘅歌，令自己增加信心；支嚳儀經過低谷後，佢唔再夾硬去唱慘情歌，揀咗開心歌《愛定你一個》。

龍婷則想唱廣東歌求突破，努力提升自己，羅啟豪覺得對手實力相近，目前大家得分差距好細，而且評審俾分開始手緊，舒文作為今集嘉賓評審，坦言好難挑剔選手表現，舒文較為著重深層情感表達。