歌神 張學友 近日推出最新國語單曲《又十年》，除咗唔少歌迷認為歌詞真實而引人共鳴之外，學友對《又十年》意境同樣感觸良多，唱唱吓就會回想起以前，而當講到拍攝歌曲MV人選時，第一個出現喺學友腦海中嘅，就係認識已經超過30年嘅老朋友導演劉偉強。

坦言人生每一個十年都一樣重要嘅學友，同劉偉強討論MV劇本時，都認為每個人心中嘅「又十年」都有不盡相同嘅回憶同故事，劉偉強仲搵埋年輕導演王昱一齊Brain Storming，王昱提議以較抽象意境呈現，保留聽眾內心嘅故事畫面。

學友新歌《又十年》邀請劉偉強為佢製作MV

MV中學友一人坐喺椅上，向空無一人嘅座位唱歌，彷彿同自己對話。看似生活平淡無味，不經意走進一個彼此有關又完全相反嘅二元對立的世界，由大自然變化到現實生活嘅高樓林立，時光流逝、萬物大地不停輪轉循環。

以鏡像一變二、二變四延展到萬花筒嘅萬千影像表達人生嘅成長歷程，無論係過去、現在定未來，每一段時空轉變都互相影響、互相重疊。張學友冋劉偉強喺兩位老友喺拍攝現場見面，對話幽默風趣令現場氣氛瞬即變得輕鬆，拍攝過程亦非常順利。

AGA江海迦早前推出新歌《Miss u Goodbye》，並到日本取景拍攝MV。由於新歌講述要面對重要嘅人離開自己生命嘅時刻，所以是次MV亦以上一首歌《MIZU》的MV中，出現過嘅東京品川水族館開始，展開另一個故事。

AGA話記得第一次收到《Miss u Goodbye》歌詞時，自己當下嘅感動同領悟，佢話：「記得收到呢份詞嘅時候，喺挪威機場。個日航班突然被取消，所以搵咗間Cafe 坐低，然後收到呢份歌詞，一路睇住歌詞、一邊聽住demo，我試住每句跟住唱，當時窗出面落住雪，突然好感動，我知道呢首歌要學懂同表達嘅，係放下。」