請1日假去旅行｜何沛珈李芷晴互相傷害 做Spa互笑結尾變濃情閨密

何沛珈 同 李芷晴 喺噚晚一集《請1日假去旅行》 繼續玩轉曼谷，一齊租傳統泰服去鄭王廟影靚相。原來當地租借泰服價錢相當平，一日價錢只需600至900泰銖，即約百零二百蚊港元，相當抵玩。打卡期間Stephanie仲化身攝影師幫Roxanne影大堆靚相，可惜就卻慘遭Roxanne嫌棄佢功力，仲要求導演接手影過，場面搞笑。

去到泰國做Spa當然唔少得，Roxanne同Stephanie就齊齊孖晒玉背歎特色水果味精油Spa，但係佢哋就一直瘋狂鬥嘴互相傷害，Stephanie仲笑言Roxanne嘅背脊捽出萬年老泥！ 

之後兩位靚女又化身為一日女友，同觀眾拍拖！ Roxanne化身性感小野貓，帶大家去有「泰國蘭桂坊」之稱嘅熱點夜蒲，暢飲特色蜜糖Cocktail嘅佢，仲親手餵觀埋眾飲，甜度爆錶。而Stephanie就化身文青女神同大家一齊參觀曼谷設計周，影靚相打卡之餘，又對鏡頭瘋狂撒嬌，大晒可愛一面。

佢哋又去到夜市接受製作組考驗，要佢哋用1000泰銖買齊10件手信，有選擇困難嘅 Stephanie全程遊魂，而Roxanne就出盡牙力瘋狂講價。Roxanne事後受訪時仲話「1000泰銖挑戰」非常難忘，佢話：「因為要以有限嘅金錢去買到10樣嘢，我要好厚面皮地去瘋狂講價，同埋我哋係分開去拍攝，要令成個拍攝冇冷場，真係一啲都唔容易。」

節目尾聲，Roxanne同Stephanie又齊齊換上泳裝，浸喺泳池深度交流互訴心聲， 仲感觸到臘都紅晒，邊講又邊拖手互相支持，Roxanne哽咽話：「我都入咗行兩年，我都未試過同一個女仔咁Close…未試過呢個體驗…」聽到眼濕濕嘅Stephanie則話：「可能大家都好大壓 力，大家都覺得競爭對手嚟喎，點樣做朋友呀，有時我都覺得你會唔會唔鍾意我呢？」

因今次行程成為更親密好友嘅佢哋，日前仲喺社交平台開Live同觀眾互動，Roxanne驚爆佢哋「肉帛相見」後，Stephanie又大爆Roxanne「浴巾」秘密：「佢會著住浴袍周圍走！」Roxanne聞言反問：「有浴袍咁多呀？」Stephanie就即再補充話： 「後尾就過份啲，但第一日未係好熟嘅時候，佢就咁沖完涼著住浴袍行出嚟，好彩你冇打開畀我睇咋。」

《請1日假去旅行 》星期四、五晚22:30 翡翠台