鄭秀文許志安結伴食日本菜賀好友生日 安仔身形圓潤不少

許志安與老婆鄭秀文（Sammi）日前與朋友Faye慶祝生日，去咗一間日式餐廳歎美食飲Sake (日本酒)，Sammi本身勁鍾意食嘢，見佢大啖食，笑得好開心，對腰果眼出晒嚟，就知道Sammi非常享受。

Faye曾經為許志安擔任形象指導，所以佢同安仔、Sammi幾老友，佢仲喺IG分別貼咗合照，指與更像姐妹嘅好友一齊慶祝生日，非常感謝佢哋給予愛、歡笑及無盡支持，令佢嘅生日更加難忘，相中見身穿西裝外套嘅安仔，與同樣身穿西裝外套嘅Sammi情侶裝襯到絕，不過安仔身形似乎比之前圓潤咗，更加精神奕奕！

安仔同Sammi於2019年經歷「安心事件」後，安仔事業跌落谷底，更一度停工，去年安仔宣佈簽約環球，重新出發，雖然安仔事業仍未見有起色，不過Sammi經常公開為對方打氣 ，今年Sammi憑電影《流水落花》連奪多個電影獎項，狀態大勇，成為今屆金像影后大熱，過去Sammi曾6度入圍香港電影金像獎，多次失落影后殊榮，未知今屆安仔會唔會陪老婆Sammi現身金像獎頒獎禮呢！？