播出踏入第三周嘅《隱形戰隊》官方社交平台再一口氣爆出兩條率先睇預告片，預告Shadow( 劉佩玥 飾)、Cool Sir( 陳山聰 飾)一家，仲有寶寶( 唐詩詠 飾)都將陷入危機。其實劇集正式播出前嘅預熱宣傳片當中，已釋出過阿Moon險遭強暴嘅鏡頭，今次官方加長版預告，以剝洋蔥手法逐步讓觀眾接近真相。

而周一(20號)播出嘅第11集，劇情講述為追查恐怖分子巴翼同馬雷，Shadow同辛Sir( 吳家樂 飾)分別「喬裝」一樓一鳳同唐樓住客，以近距離埋恐怖分子身進行調查，Shadow仲因惹火「一樓一」打扮惹禍。預告所見，身穿性感絲質睡衣嘅Shadow，準備閂門之際，巴翼登門造訪表示要「幫襯」，大為慌張嘅Shadow為免「一樓一」身份穿煲，情急智生以月事作借口企圖脫身，最終難敵巴翼「霸王硬上弓」，被捉住拋在床上情況危急。

阿Moon性感喬裝但係竟成為狼抓下嘅獵物

預告片同宣傳照中，阿Moon再度大晒長腿，唔止一對美腿又直又長令人羨慕，就連白滑度亦備受關注，加上角色性格討喜，劇集熱播後成功入屋。對自己嘅長腿成為劇集亮點，阿Moon就話非常開心，仲大方分享兩大保養心得，：「其實我細個唔係好高，低年班時都係排前面嗰幾個，去到大約中四先至突然開始長高，我諗都關我鍾意運動事。因為以前有打排球，我又好鍾意跑步，所以我覺得做運動同成日飲水都會令到個腳形靚啲。」

到底最後呢個危機會演變成點呢？

阿Moon又指多散步亦對保持靚腳形有幫助：「我食完飯之後都會去行吓，又會去公園或者行山，所以我覺得適量同適當嘅運動，都會對身形有幫助。」至於經常拍外景都能保持白滑皮膚，阿Moon就話除咗防曬之外，注意飲食亦非常重要：「唔好成日食啲好濃味、或顏色好深嘅食物，味精唔好食咁多，同埋最緊要保持身心開朗，飲多啲水就ok架喇。」

而談到Shadow身陷險境一幕，Moon就透露拍攝時有一定難度：「因為個廠真係好凍， 同埋張床唔係床嚟，係一嚿好硬嘅嘢上面有啲被鋪。我同對手廖家爵對戲時，佢都好緊張，因為驚整親我。我覺得呢類戲最緊要演員之間有溝通同信任，所以我哋最後都好順利完成。」

而另一預告片亦極盡視覺震撼，Cool Sir媽咪淑珠( 蘇恩磁 飾)、姐姐 顧晨麗( 樊亦敏 飾)、外甥女珊珊( 伍樂怡 飾)喺茶餐廳準備閂門時，遇上突然衝入大廈亂槍掃射嘅悍匪，晨麗同珊珊嚇到拔足狂奔，仲同其他食客仲有途人齊齊成為人質，珊珊更被嚇至花容失色，氣氛緊張。

Cool Sir幾位家人又突然遇上持槍悍匪，情況危急

《隱形戰隊》星期一至五晚 20:30 翡翠台

TVB熱播劇《隱形戰隊》，昨晚（20日）播出第十一集，繼續集精彩與輕鬆於一身，為了捉拿以巴翼（廖家爵飾）及馬雷（李偉霆飾）為首的七人恐怖份子集團，Ocean（馬國明飾）、寶寶（唐詩詠飾）、Shadow（劉佩玥飾）及囡囡（林子善飾）等POTT隊員進行了一連串跟蹤及潛伏行動，除了Shadow喬裝一樓一以身犯險，寶寶亦喬裝外送員在巴翼等人藏身大廈安裝偷拍器，並因而捲入危機，與巴翼及馬雷在𨋢內困獸鬥……

該幕為時分半鐘左右的「𨋢內試探」拍得緊湊，詩詠亦憑藉三大層次變化突顯視后功架。戴了通訊器的寶寶，因受到玩具車遙控器干擾感不適，此時巴翼及馬雷突然殺入𨋢，原本因干擾感不適的詩詠只能強裝鎮定。其間，詩詠不但谷出滿眶淚水來表達角色有多難受，還不忘演繹出偶爾低調地透大氣的狀態及強顏歡笑等表情，三大層次變化令觀眾看得入戲。加上鏡頭不停穿插於三名演員的大頭及左右搖擺，整體氣氛更見緊張。最後隨着Ocean解除干擾危機，寶寶拉下耳機扮撩耳故作輕鬆，觀眾的神經才得以放鬆….

另外，詩詠昨晚與劉佩玥的「不和升級戰」亦很搶，每逢見面倍扯火的二人，昨晚由辦公室「踩過界」鬥到瑜伽房，名副其實先是口角繼而動武。事緣寶寶不滿哥哥囡囡因Shadow淪為觀音兵致發燒收場，甫見Shadow即針鋒相對：「咩年紀都好，最緊要唔好心地差」，不甘示弱的Shadow立即回了一句：「點都好過皮膚差。」之後二人繼續口角還開始動武，除大玩「暴力拉筋」及「人肉互壓」外，更玩埋摔交，寶寶以大髀夾實Shadow頭部，互扯頭髮兼叉頸，由於二人喜感節奏掌握得宜、表情亦相當多變抵死，成昨晚亮點之一！