陳家樂爆連詩雅試婚紗減肥入魔 公佈兄弟姊妹團人選

甄子丹、Gin Lee（李幸倪）、方中信、蔡加讚、湯怡、陳家樂、沈震軒、汪圓圓及汪詩詩等出席馬場活動，甄子丹出席完奧斯卡頒獎禮返港，呢日同太太汪詩詩現身馬場活動。

甄子丹喺現場見證好友楊紫瓊封奧斯卡影后，首位華裔女演員奪得呢個殊榮，同屬動作演員出身嘅甄子丹，非常戥楊紫瓊開心，可以為華人爭光，甄子丹覺得好感動，頓時眼濕濕。

甄子丹亦回應被聯署抵制一事：「我都喺奧斯卡返咗嚟啦！每個人都可以有自己嘅言論觀點，呢個世界要多啲包容、多啲愛，唔需要太多呢啲暴力行為。」講到新戲男演員Lance Reddick突然離世，甄子丹表示震驚又惋惜；同場出席活動嘅Gin Lee，分享今年年底有開騷計劃回饋fans，自爆將與黃偉文合作情歌。

陳家樂下個月舉行婚禮，佢自爆連詩雅減肥入魔，陳家樂笑指無奈要跟上未婚妻步伐：「佢減得好勁，我一直有叫佢唔使減，本身已經太瘦，每次佢自己去試完婚紗之後，佢返到嚟都係唔開心，話自己好肥，要再減再減，我都逼佢唔到！」陳家樂透露曾演出電影《不日成婚》嘅岑珈其及朱栢康肯做兄弟，而連詩雅姊妹團有黃翠如及陳自瑤，暫時未知佢哋工作會否撞期，仍在安排中。