陳柏宇玻璃車廂演唱如天際開騷 盼帶囡囡同行拍拖撇甩老婆

早前成為首位香港歌手登錄日本知名音樂平台《THE FIRST TAKE》演繹兩首新舊作品，又啱啱再為人父嘅 陳柏宇 日前又拍攝《360°天際柏住唱》，3月23號就會喺纜車嘅社交平台播出，Jason喺全景纜車車廂唱出多首情歌，其中包括百萬點撃作「有天」。

Jason仲話喺纜車上唱歌別有一種滋味：「好有衝上雲霄嘅感覺，唱嗰一刻真係喺天度，真係好啱喺呢度唱。」佢仲話呢日自己大頭蝦連耳機都唔記得帶就演出，又笑指車廂唱歌環境同錄音室近似：「因為纜車唱歌冇觀眾，而且車廂都冇咩迴音，配埋咁開揚嘅景觀，成個感覺都好特別。」

佢又話想搵機會同家人再次郊遊，不過就話係想同前世情人囡囡「拍拖」，唔帶老婆同行，認真大膽呀：「其實我都想同囡囡搭吓纜車，上次一齊嚟都已經係年半之前，當時車廂都冇咁靚同整塊透明玻璃，佢依家四歲再嚟，應該識好多嘢嘅年紀，我估佢會好開心，不過太太就有啲畏高，依家剛剛生完唔好嚇佢啦。」

太太啱啱先誕下愛囡，不過Jason已努力為新歌宣傳賺奶粉錢喇：「上隻碟個奮鬥感會好沉重嘅，下張新碟會有開心嘅氣氛。」佢希望歌曲可以為歌迷帶來正能量：「有好多Fans由我出道以來就支持我，雖然已經十五年，但仍然願意花心思俾Surprise我，喺演唱會上同導演、樂隊夾好嚟個驚喜大合唱環節，聽到前奏嗰下我完全無諗過，以為只係間場音樂，腦海一片空白，所以衷心多謝佢哋。」