旅遊節目《請1日假去旅行》話咁快已經去到最後一個地點,就係香港人最愛搭飛機個零鐘就到嗁台北喇,今次再由曾拍檔合作嘅地膽 金剛 同 余思霆 帶大家同圍去,佢哋先後到訪台北著名景點大稻埕、 寧夏夜市、特色手信店雲集嘅永康街、北投溫泉勝地、特色地道小食店同CP值超高嘅火鍋店等,之後又再去歎Spa同滑水,更加會希大家試吓連續五年獲米芝蓮指南必比登推薦嘅食店。
為咗迎接「下水禮」,思霆一早做足準備,帶定兩套唔同款式泳衣展示美好身段,先以白色三點式浸溫泉,之後再以黑色比堅尼top配運動短褲上陣玩滑水。令人驚艷嘅係,平時斯文嬌嗲嘅思霆滑水時英姿煥發,擁有一雙修長美腿嘅佢在滑水板上表現自信兼有型有款;相反平時聲大嘅金剛就未出發先喊驚,就算喺橡皮艇齋坐已經瘋狂尖叫又嚇到面容扭曲,同思霆相映成趣。
今次節目又演變成金剛「自爆」之旅,佢除咗自揭戀愛瘡疤,又大晒香港觀眾久違嘅「金剛話」,先後將高科技、桃花、工廠、主角同雞子變成「膠」科技、 「頭」花、工「腸」、主「腳」同「基子」,搞到同鄉思霆都哭笑不得。
佢自爆戀愛之路由去拍攝大稻埕月老廟開始,金剛先戲弄思霆叫對方拜月老求姻緣,點知思 霆就反叫金剛祈求可以「挽回感情」,金剛聞言就話:「對我嚟講過去就過去,好似白紙一張咁咋!」
後來思霆品嚐精緻甜品時被紫色糕點吸引,金剛見狀就即意有所指還擊:「呢啲咪就係膚淺咯,成日睇靚好,你睇我瀨嘢幾多次,嗰啲好靚、好索呀咪瀨嘢咯,你好似都係喎!」之後又話自己同思霆「同病相憐」,非常Juicy。
而金剛帶思霆介紹特色咖啡店時,又被思霆突擊問佢:「你帶過幾多個女仔嚟呢度?」金剛聞言就急忙辯解:「兩個啫,我以前好專情嘅」,之後又補飛話:「我依家都好專情!」金剛同思霆雖然一唱一和,不過喺台北一會合就嫌棄女方「冇新鮮感」喇,想知點解,就記得留意聽晚播出嘅節目喇。
《請1日假去旅行》星期四、五晚 22:30 翡翠台