賭王孻女何超欣同孫女何鍶珩呢日出席活動，對於何超蓮傳下月將會喺峇里舉行世界婚禮同傳已經喺三亞秘婚，超欣就避而不答，但問到佢阿嫂奚夢瑤傳再懷孕一事，超欣就話當晚自己同對方一齊，佢話當時奚夢瑤唔只着咗對好高嘅高踭鞋，仲同自己一齊飲酒，所以相信傳聞唔係真嘅。而家主力從事環保工作嘅超欣，喺清華大學入面做環保教育，早前仲帶學生去咗埃及呀。

同場出席嘅仲有Jennifer 余香凝，對於舊愛陳家樂將會喺下月同連詩雅拉埋天窗，Jennifer話自己就冇特別打擾對方，但係衷心祝福對方，仲話每一個人能夠找到另一半係一件樂幸福嘅事呀。

陳家樂與連詩雅婚後首次一齊出席公開活動，佢哋以夫妻檔現身反而有啲緊張，感覺有啲似Big Day咁，家樂笑指自己份酬勞係用喺屋企，而連詩雅嘅酬勞就係太太個人收入。

家樂全程戴住黑超，原來佢眼部因運動唔小心撞到，佢慶幸喺醫院接受治理幾日便出院，唔需要做手術，不過家樂稱傷勢仍要一段時間先康復：「瞓醒覺一起身就見到紅咗，陳太好緊張好擔心，就send咗啲相畀佢認識嘅眼科醫生，醫生指唔係好正常，亦好彩照完發現眼球後面有少少問題先滲血，好在發現得早！」