謝君豪登「陸」可以兩蚊搭車 圈中半百演員為其賀壽

謝君豪登「陸」可以兩蚊搭車 圈中半百演員為其賀壽

生日快樂!3月23號係謝君豪嘅60歲正日生日!登「陸」咁大件事,佢嘅一班圈中好友當然要同佢大肆慶祝啦!所以幫佢搞咗個「謝君豪影藝好友派對」,雖然話就話係生日派對,但係出席嘅粒粒皆星,劉嘉玲、毛舜筠、Stephy鄧麗欣、廖子妤、Louise王丹妮、Jeffrey魏浚笙、栢天男、谷德昭、張達明、陳國邦、梁仲恆等外,仲有多位電影公司老闆同導演:寰宇電影公司老闆林小明、安樂影片公司老闆江志強、電影監製何韻明、電影監製曹敬文、導演邱禮濤、導演吳煒倫、導演曾慶宏、導演李駿碩、《風再起時》監製朱嘉懿等,儼如一個小形電影頒獎禮一樣!
加埋隻燒豬,好似開鏡拜神咁呀!
席上謝君豪除咗親自開金口獻唱外,一班影壇後輩Fish、Louise以同Jeffrey等亦有一齊送上生日歌,之後大家又一眾切燒豬作為「生日蛋糕」賀壽,楊受成更送上一大束靚花祝賀,Louise及Fish喺片中介紹自己嘅禮物,大家讚Louise好有心思,原來佢上網搵晒謝君豪歷年演過嘅角色嘅相,親手剪貼好晒嚟做禮物送畀對方。而知道謝君豪喜歡小酌一番嘅Fish,就揀咗一支既有外表,內又富有伯爵茶清新香味嘅氈酒做禮物,至於Jeffrey除咗送香檳外,仲特意訂製咗一個新嘅手機殼畀最近啱啱換咗新電話嘅謝君豪!
劉嘉玲亦有出席賀謝君豪登陸。毛舜筠同埋老公區丁平一齊到場。
見到咁多位好友嚟同自己賀壽,加上今年兩部有份演出嘅電影《毒舌大狀》同《明日戰記》都打入港產片十大,所以謝君豪喺台上開心咁話:「這麼多年在舞台上跟各位觀眾見面,今年非常幸運有不同的作品,又可以跟各位世叔伯打招呼,一時又要拯救地球、一時又要揸的士、一時又要打官司,覺得既過癮又開心,感謝大家、電影公司、各位老闆以及夥伙們畀機會我一同合作,相當榮幸,希望日後有更加多的合作機會。」之後佢又笑言自己已經踏入可用兩蚊搭車嘅年紀,雖然係咁,但佢言自己仲有夢想,仲同在場眾人共勉,話大家一齊努力。
鄧麗欣、謝君豪同梁仲恆。兩大型男謝君豪與魏浚笙。一眾圈中好友為謝君豪賀壽。王丹妮自己整咗份禮物送畀謝君豪。
謝君豪話自己本身冇諗住搞生日會,但因為今年踏入60歲否以$2搭車,自我覺得呢件事好正,所以經理人先提議幫佢搞生日會。講到切燒豬時眼泛淚光,謝君豪笑言:「有點感觸、感動,大家陪我過這個生日,其實我很久未有在香港跟觀眾見面,這大半年來有數套作品相當開心,喜見大家都接受,相當感謝各位。踏入60歲,其實數字只是個標誌,30、40、50歲每個數字都有它的意義,直到60歲覺得自己再長大了點,但就不是個老成持重、得高望重的老人家,最緊要是保持青春、年輕及激情的一團火。現時希望再開拓一些新的興趣,例如攝影。」
兩大迷妹:王丹妮與廖子妤。
至於問到今年收到嘅禮物有咩?謝君豪表示大部分都是酒,但佢就為自己澄清自己只係可以小酌,唔算係個飲得之人,佢又感謝大家送嘅禮物,仲讚Jeffrey送畀佢個手機殼好潮自己好鍾意!

電影導演會頒獎|梁朝偉再獲得影帝殊榮 余香凝首膺影后喜極而泣

影圈年度盛事《2024香港電影導演會周年晚宴暨年度頒獎典禮》,3月15號喺尖沙咀一間酒店隆重舉行,現場眾星雲集,好似洪金寶同太太高麗虹、林峯、馮德倫、錢嘉樂、鄧麗欣、周家怡、周麗淇、蔡卓妍、關智斌、陳家樂、王浩然、余香凝、伍詠薇、葉子媚、魏浚笙、廖子妤、王丹妮、劉偉強導演等等。
  
近年受糖尿病困擾嘅洪金寶,之前曾經以輪椅代步,呢日改為撐拐杖,精神奕奕現身。洪金寶指近年日常生活多數是買餸煮飯,已經甚少外出搵朋友聚舊,因為要保持健康飲食習慣,怕自己出到去茶餐廳又會忍唔到口好辛苦,現時每日都會食青瓜、蕃茄充飢,非常健康。亦遵照醫生意見有適量運動,例如行路,不過只可以短程。被問到游乾水(麻雀耍樂)也是運動一種?大哥洪金寶好搞笑話:「以前都會游,但游游吓另外三個死晒,因為我又鬧又啪枱又盛,冇人再肯同我打。」

梁朝偉憑電影《金手指》獲「最佳男主角」,再次封帝嘅偉仔保持平常心,並透露每日都過住慶祝生活,因為生命每日都要珍惜。偉仔稍後將會起程遠赴德國拍戲,喺電影中偉仔會飾演一位腦神經科學家,佢早喺半年前已經開始睇書、搜集資料以及到訪大學認識腦神經科學家取經,為開拍新戲做足準備。至於老婆劉嘉玲會否同行?偉仔則表示未必。

偉仔呢晚都有同影后余香凝合照,更表示有欣賞對方主演嘅電影《白日之下》,大讚電影好睇,特別欣賞姜大衞演技。

余香凝憑主演嘅《白日之下》獲「最佳女主角」首度封后,手持獎項影相期間佢突然忍唔住爆喊:「好多人都唔知道,其實我個樣越淡定係越緊張,但真係好開心,冇諗過今晚會得到呢個獎,見到台下好多熟悉朋友同合作過嘅導演,獎項對我來講義意重大,出到來見到好多睇住我大嘅人,突然好多情緒出嚟。」至於能夠首度同魅力男神兼出爐影帝偉仔集郵,余香凝極度興奮,仲話會將呢張合照曬大放喺獎項側邊留念。

而獲得「最佳新演員」獎嘅謝咏欣則表示好興奮,完全冇預計過自己會得獎,當下最想多謝祝紫嫣導演,以及戲中飾佢爸爸嘅吳慷仁。

近期計劃復出娛樂圈嘅葉子媚相隔30年現身活動,佢仲記得對上一次喺活動上抽到大獎。而佢嘅復出大計正在實行中,透露主要想拍戲,不過歸於平淡生活,作息養生多年,葉子媚坦承要適應生活有啲難度,因為現時若果不用應酬或出街,晚上七點左右就會瞓覺。

另外,近日張達倫喺新戲《出租家人》中飾演一位警察,電影武術指導錢嘉樂就設計咗個驚險動作畀佢,要張達倫飛身撲向架車到,好彩最後都成功挑戰鏡頭,對佢嚟講亦係個大突破。

 相關推薦

熱門搜尋