金馬影帝謝君豪呢日（23日）迎來60歲生日，特意舉辦「謝君豪影藝好友派對」，以「君豪」二字寫上「君臨天下，豪戲連場」，當晚邀來好友劉嘉玲與毛舜筠陪佢一齊切燒豬，鄧麗欣、王丹妮、廖子妤、谷德昭、張達明、陳國邦及栢天男等圈中人到賀。

眾人一齊為佢獻唱生日歌，謝君豪覺得相當開心，佢近排有幾套作品先後上映，作品大獲好評，佢笑指過生日最開心係獲得長者搭車優惠價，目前仍要保持激情及青春，同時佢亦想發展攝影嘅興趣，開拓唔同領域，此外，王丹妮及廖子妤亦精心送上禮物畀前輩。

王丹妮及陳星妤呢日出席一個藝術展活動，陳星妤憑《一舞傾城》而人氣急升，佢指KK呢個角色越拍越大壓力，只好不斷問導演、姚子羚及陳法蓉嘅意見，慢慢睇到自己有進步。

王丹妮以一頭短髮造型現身，佢笑指幾個月後將接拍新片，目前要積極留一頭長髮；同場仲有已故戴安娜王妃雙胞胎姪女Lady Amelia Spencer同Lady Eliza Spencer，王丹妮大讚二人好友善，好開心佢哋第一次嚟香港就見到面。