吳啟華黎瑞恩眾星中山打Golf慈善賽 鄧梓峰遇林敏驄：算時運高定低？

圈中藝人閒時愛打高爾夫球，私下不時相約打球及聚會，更成立香港藝人高爾夫協會，樂做慈善公益活動，近日佢哋出發去中山參與一個慈善比賽，連日鄧梓峰喺微博上載合照，多位圈中人現身，彼此切磋球技。

相中見任達華、鄧梓峰、黎瑞恩、吳啟華、林韋辰、林敏驄、單文柔、陳展鵬、甄志強、譚玉瑛、劉玉翠、陳寶轅、肥媽、區瑞強、李麗霞、尹揚明及張頴康等均有席，疫情後難得眾人聚首一堂，佢哋不時興奮合照，場面非常熱鬧，鄧梓峰稱已三年冇上去中山打波，幸好球技仍然打得唔錯，噚日正式打慈善比賽，鄧梓峰遇到林敏驄，佢配合林敏驄搞笑作風，寫道：「竟然畀我遇到阿驄，我算時運高定低？」

香港藝人高爾夫協會於2004年7月成立，由秦沛及一眾歌影視界藝人共同組成，秦沛為創會會長、第二任會長係鄧梓峰，現任會長係「小恩子」黎瑞恩，而成龍及曾志偉則係協會名譽會長。