4月1 號係一代巨星張國榮逝世20周年，連串跟哥哥相關嘅紀念活動陸續展開，葛民輝、陳幼堅及文雋呢日出席創作展，當中展出不少哥哥嘅珍藏，哥哥1:1銅像雕像亦係焦點所在。

葛民輝有份參與雕像製作過程，稱哥哥呢個雕像製造一絲不苟，更分享最佳觀賞角度，而昔日跟哥哥合作無間嘅設計師陳幼堅，過往為哥哥設計多個唱片封套，佢大讚哥哥係一個非常重情嘅人，又試過陪哥哥去日本錄《無心睡眠》、東京影唱片封套，二人仲一齊去逛街買嘢。

星期六晚播出嘅一集《馬時亨 香港情》主題係「音樂情懷」，除咗邀請縱橫樂壇半世紀嘅 譚詠麟 擔任嘉賓，還加埋有「民歌王子」之稱嘅 區瑞強 擔任客席主持。被稱為樂壇校長嘅阿倫，節目中勸勉後輩「千祈唔好怕蝕底，能夠喺台度亮一亮相都係好」，隨即被Albert大爆當年 紅透半邊天嘅校長，連《香港早晨》錄影都唔放過，Albert話：「之前許冠傑係好難訪問到佢，佢直頭唔上電視。但校長啱啱調轉，咩節目都去，下午茶又去，最離譜係《香港早晨》！」

區瑞強爆譚校長當年為爭取宣傳，任何機會都會答應

校長笑稱：「好記得要(清晨)四點幾入去化妝準備。」仲話只要亮相節目可以幫到幕後人員，都樂意抽空配合，Albert亦大讚校長： 「所謂形象唔係報紙講點點點就係，係要真實人哋親身經歷過，先會覺得：『你真係ok喎』。」

校長又憶述當年同好友張國榮出席「東京音樂節」時，因撞衫引發笑話，自己因而情急智生「爆肚」化解危機，校長話：「我哋一到埗有個記招，咁我同Leslie一出𨋢，我哋成件粉紅色嘅外套係一模一樣，衫褲又同一Set顏色， 我哋自己都係咁喺度笑。但當時有記者嘛，我就即刻攬住Leslie話『We are Hong Kong team』。」

見慣大場面嘅校長，又提到1994年嘅「大球場細細聲演唱會」風波：「之前有啲外國歌手嚟演出已經引發好多投訴，所以我場演唱會係備受矚目，臨演出前嗰個禮拜不斷有消息話『唔畀唱、唔畀開』。嗰時我每日出街，都係要面對超過三百個中外記者，係國際新聞嚟。」校長續指為解決噪音問題，當年專誠添置了價值近二千萬的器材，但仍為現場很多樂迷大部分時間 基本上聽不到任何音樂感到歉意，校長謂：「嗰三晚觀眾係坐滿，佢哋完全冇投訴，仲要自得其樂咁喺度買嘢食、買嘢飲，我真係好感動。」