星期五晚一集嘅《隱形戰隊》邢風( 劉穎鏇 飾)同Shadow( 劉佩玥 飾)經過多輪特訓，正式踩入虎穴，成功混進「拐賣少女事件」犯人收藏少女嘅貨櫃，尋回辛Sir( 吳家樂 飾)女兒瑤瑤( 關嘉敏 飾)後，即找緊時機衝出重圍，同犯人展開連場追逐同搏火。

Tiffany同阿Moon為救被拐少女，不惜以身犯險

其實噚晚亮點都集中喺Tiffany身上，而之前因為Madam Fong( 江美儀 飾)不想親女冒險為此爭吵不休，直至呢一集，身為媽媽嘅Madam Fong受被害少女母親嘅傷痛觸動，改變主意俾邢風參與直搗虎穴行動，令邢風喜出望外；眼見女兒興奮又雀躍，Madam Fong 流露出幸福又慈愛嘅笑容，不過邢風離去後又轉喜為憂，仲谷出擔憂嘅眼淚，簡單幾個眼神就清楚交代為母內心嘅轉折同煎熬。

但係江美儀就對Tiffany嘅行動非常擔心

美儀姐仲大讚Tiffany乖巧又聽話，仲話非常難忘第一日一齊開工嘅搞笑事：「嗰日開廠景，你知佢啲衫幾薄架喇，我又唔醒起個廠好凍，我哋兩母女就喺度震騰騰，我問：『阿女你有冇衫著』，佢就話：『冇呀，我係得呢啲架咋』，但佢又猛話冇事。」

而Tiffany亦笑指每次美儀姐見到自己，都叮囑要著多件衫，又搞笑問佢：「真係咁熱咩？」提到同美儀姐有多場對手戲，Tiffany就坦言非常幸運： 「美儀姐係視后級，所以一知道同佢有好多對手戲時都好緊張，同埋話晒第一次 合作。但佢好好，我哋未正式開工前，佢有私底下 message同我傾吓套劇、等我可以思考多啲點做。佢唔單止教我，仲畀到我好舒服嘅感覺，令我完全放低緊張嘅心態。」

至於兩母女嘅「和解」場面，Tiffany話拍攝時已充份感受到美儀姐角色嘅慈愛同矛盾：「我哋頭先圍埋一齊睇呢集，我同Moon講單睇美儀姐眼神，就感受到佢嗰種擔心，同埋對女兒嘅放手同信心，我都睇到好感動。」

其實Tiffany嘅打戲亦非常精彩，除咗同阿Moon練閉氣一幕嘅飄逸秀髮Look，之後喺貨櫃將匪徙凌空打到飛起亦非常有型，Tiffany同壞人嘅 「牛仔褸拉扯戰」更引起網絡熱議。Tiffany更自揭角色造型上嘅小秘密：「其實我拍呢套劇時係戴住假髮嘅，因為嗰時我頭髮仲好短，所以要整一片片嘅假髮啪上頭髮度。嗰次嘅難度係，每次對手掹我件牛仔褸，都會掹鬆埋我個假髮夾，搞到我成日甩頭髮，好搞笑。至於撻嗰吓，其實武師辛苦過我，佢主要係發力去做動作嗰個，而我就盡力配合番佢做到最好。」

原來Tiffany係以假髮上陣拍攝打戲，仲拍到髮片都幾乎甩出嚟

而TVB社交平台日公開嘅NG片段中，鏡頭前熱血又好打嘅Tiffany，私下其實係「遴迍妹」，唔止成日大頭蝦講錯對白，仲試過拍食藥戲時將道具藥飛出街都唔知。而每當知道自己蝦碌NG，Tiffany都會吐舌、反眼、傻笑、尷尬扮走人或者抱頭怪叫，可愛度爆燈。

《2023香港小姐》舉行招募記者會，張寶兒分享懷孕喜悅心情；陳庭欣、林凱恩、劉穎鏇透露有意介紹身邊親朋好友參選。