《無限超越群星演唱會》星期六晚喺澳門舉行， 楊千嬅 林峯 吳卓羲 黃宗澤 林保怡 久未露面嘅 陳慧珊 胡鴻鈞 吳若希 炎明熹 曾比特 譚嘉儀 同 涂毓麟 等分別上台獻唱大量經典劇集歌曲，吸引過萬觀眾入場欣賞。

近年淡出幕前投身教育事業嘅Flora，呢日同當年好拍檔 保怡合體，雖然已經好耐冇合作，不過其實私下成日聯絡，原來呢次仲係佢哋首次同台合唱登台，難怪佢哋話緊張有興奮喇。至於佢哋會唔會再次喺螢幕同大家見面，保怡就話絕對有機會，不過就要等自己好好安排劇本，而Flora亦都話自己隨時準備好咁話呀。

而Jinny亦都話趁呢日把握機會，搵佢哋集郵合照，至於嘉儀亦都話要搵唔同前輩合照，不過就似乎激親Hubert咁喇。炎明熹近日推出新歌《大開眼界》，外界點擊同好評不斷，連戰友阿Rock都喺網上自彈自唱Cover，呢日佢就話希望有機會可以一齊合唱喇。

而早前被指同戴祖儀傳緋聞嘅Oscar，雖然秒被Joey否認，不過近日又被發現同女性親密搭交通工具，主角呢日就話只係同朋友出街。而阿Mike亦不時喺街頭被野生捕獲，呢日佢就話大家遇到佢可以隨時同佢打招呼喇。

慈善籌款節目《萬眾同心公益金》6月3號晚圓滿結束，多位嘉賓為慈善落力表演，好似 炎明熹 《中年好聲音》嘅 周吉佩 李佳 龍婷 羅啟豪 顏志恒 吳大強 等，加埋 陳美齡 譚嘉儀 曾比特 朱主愛 余宗遙 鍾柔美 ，而近年甚少公開演出嘅 張德蘭 呢日亦罕有登台為慈善出力，仲話非常留意《聲夢》同《好聲音》參賽者嘅演出呀。

呢日唔少參與歌手都把握機會同佢合照，當中梗係唔少得Gigi啦，而Gigi仲大爆平時極少同藝人合照嘅姑丈，呢日都公開要求集郵，Gigi仲笑返怕醜姑丈轉頭呀。

Yumi好快就會踏入中學最後一年，近日正埋首溫習考試嘅佢，就話已經開始對來年嘅DSE感到緊張，仲話會好好安排時間準備，不過大家亦唔使擔心，因為佢同Gigi都好快會有新歌推出喇。

早前往美國登台開騷嘅 許志安 呢日都係表演嘉賓之一，佢亦現場獻唱新歌，受訪時亦提到重訪一廠見到現場觀眾令自己憶起當年，又指即將會喺新加坡開騷，亦正籌備香港嘅表演，不過估計就要出年先可以成事喇。

《中年好聲音》嘅幾位成員呢晚由過去嘅觀眾變成表演者，佢哋都覺得非常開心，仲話感覺非常有趣呀。羅啟豪呢晚就再同媽咪同台演出，不過羅媽媽就話非常緊張喇。龍婷同李佳呢晚亦大展歌喉，不過去到後台就變成小Fans同各位前輩見面合照喇。

新時代歌手阿Mike亦都同朱主愛仲有余宗遙合作，仲爆不時狂Loop朱主愛嘅網絡神曲咁話呀。