3月29號就係涉足歌影兩棲嘅 謝高晉 30歲生日，為咗隆重其事佢特意到好友 龐景峰 新開設嘅「新道館」接受一日特技人挑戰自己，仲體驗吊威吔扮超人一飛衝天。為咗慶祝人生踏入3字頭，謝高晉安排自己加入一班特技學生一齊接受訓練，體驗做特技人嘅滋味，Andrew更親自落場教導，同學們就輪流體驗吊威吔飛天感覺。

期間Andrew又同一班學生，為「壽星仔」謝高晉送上驚喜，等佢邊飛邊吹蠟燭。Andrew手捧蛋糕親自度位，試位一次就成功令謝高晉吹熄蠟燭，而一班特技同學就一齊大唱生日歌，又被讚充滿特技人天份，每個動作都學一次就識呀。

謝高晉吊住威吔成功吹蠟燭，令佢今年生日非常難忘

事後謝高晉就坦言非常開心：「我從來無諗過可以吊住威吔吹蠟燭，的確非常有心思。唔想再唱K同人逼，趁生日打搞Andrew試做一日特技人，玩吓新嘢。Andrew自細練武術，又去荷里活拍武打嘢，同佢過一、兩招，接受極大挑戰。」

身為籃球員嘅佢又直呼唔同武打動作仲有吊威吔都好好玩，似乎對拍動作戲有非常大渴望喎：「的確好好玩，刺激、新穎。以前拍戲嘅時候經歷過爆破、出手打，而吊威吔之前喺內地見人做過，但今次親身感受到，原來要做好多安全措施，做特技要安全第一。」

謝高晉趁踏入30歲增值自己，跟老友龐景峰學特技動作深造

經過今次體驗，佢仲直言視Andrew為師傅：「只係用咗一日，就教識我後空翻，之後會再跟Andrew學其他嘢。」至於會唔會想向特技人方向發展，佢就話希望將來嘗試打戲，仲膽生毛話：「就算廿幾樓跳落嚟一樣唔怕，我都會盡力去做好，把握每一個機會。」

而講到今年生日願望，佢就希望可以多一啲拍攝機會冋唱多啲好歌俾大家聽喇：「仲要多謝爸爸媽媽將我帶來這個世界。」仲趁機宣傳新歌《白羊男孩的情書》，又笑住提醒大家好好珍惜白羊座朋友：「唔好覺得佢哋煩，其實佢哋只係太緊張啫。」

夏日熱辣辣，連天文台今年都加設極端酷熱天氣提示，而唔少女士都紛紛以清涼打扮外出，好似呢日 林明禎就以露背小背心加一條短裙仔現身活動，唔知在場男士見到會唔會覺得熱上加熱呢？

為飲品店現身嘅明禎啱啱度過33歲生日，慶祝活動未停過，不過呢日依然Fit到爆，呢日佢仲話今年收到最愛嘅BLACKPINK成員Lisa親筆簽名作為禮物，呢日佢講起都感覺到佢非常開心呀。

明禎大小活動同唔同代言都成日現身，所以呢日佢就話連瞓覺都唔夠，所以都唔使話旨意有拖拍喇。雖然近年佢專注唔同電影同廣告工作，不過以歌手身份出道嘅佢，就話希望可以三棲發展，仲話會安排返台北錄音造新歌呀。

年初已經租屋嘅明禎，又話雖然有安樂窩，不過就始終嫌地方唔夠大，所以會繼續努力工作，希望可以早日買到背山面海嘅大屋咁話呀。