周遊關西丨與曾志偉去關西拍旅遊節目 日本通周奕瑋靠對方帶食好東西

周奕瑋 Javis 主持嘅新一輯《周遊關西》終於出發喇！呢日佢就嚟到機場出發，而呢次係繼《請1日假去旅行》後再與曾志偉同行。

平日工作勁忙嘅志偉，笑言自己呢次係偷偷地去旅行，想睇下Javis點樣遊關西。而Javis就話因為最近又有新航線，大家可以由香港直飛大阪關西機場，所以佢代大家體驗一下呢條新航線，順便帶全港市民一齊去下關西旅行。雖然話Javis係出名嘅日本通，但佢話呢次會反傳統，由志偉帶佢去品嚐美食。

之前同陳嘉慧主持嘅《請1日假去旅行》東京篇，唔少網民睇完都讚佢兩個好有CP感，但唯一美中不足嘅係集數太少，大家睇到唔夠喉。見到觀眾反應咁好，Javis就話呢次《周遊關西》集數會比上次多，期間佢仲會走勻成個關西幫大家發掘好玩好食嘅地方呀。

嚟緊就係5.1黃金周，應該有唔少旅客會趁呢個假期去旅行，日本通Javis就同大家補習一下日本文化，原來5月頭亦係日本一個旅行旺季，佢哋都會趁呢個黃金周去旅遊，所以呢個時間雖然會多人，但同時亦有唔少活動會係喺呢段期間先有呀。