方力申望女友走出悲傷繼續前行 開工拍《逆天奇案2》演聰明教授

方力申與陳庭欣呢日現身一個慈善晚宴，小方女友葉萱（Maple）捲韓國攝理教教主鄭明析性侵女信徒一案，Maple早前抵韓國出庭作證，喺父親陪同下再接受訪問，期間情緒再度崩潰，精神狀態惹關注，小方呢日開腔回應，希望大家move on唔好一直將焦點放喺呢件事上。

小方認為女友Maple情緒越來越好，二人多咗時間相處，佢望女友生活上多啲開心，目前案件仍未完結，有更多新證人及證據，佢唔想女友日日關注喺呢件事，大家可以繼續前行，過一啲開心嘅生活。

小方將要開工拍劇集《逆天奇案2》，要擺脫敗家富二代形象，今次飾演聰明教授，主要跟林夏薇比較多對手戲，小方坦言比較少時間陪女友，小方指今次係留喺香港做嘢，多啲時間可以見到對方，小方亦為呢個角色積極減肥，以生酮飲食一個月成功減8磅。