中年演唱會｜26位好聲音連唱兩場 士氣高漲歌聲越唱越強

《中年好聲音夢想成真》演唱會星期六正式開鑼，26位成員一日內唱足兩場，開騷前士氣更非常高漲。分別踏上呢個夢想舞台嘅佢哋，仲以比賽時更華麗嘅表演同大家見面，而早前暈倒嘅 吳大強 亦以非常好嘅狀態上台為大家表演，似乎已經完全無礙喇。

打頭陣嘅佢仲話醫生詳細檢查後完全冇問題，佢仲同 顏志恒 「再續前弦」再次合唱，Benson仲話表演同之前比賽感覺完全唔一樣呀。呢晚佢哋喺現場為台下觀眾表演咗多首唔同歌曲，當中仲包括連串快歌，而 周吉佩 就話今次名乎其實係夢想成真，落台同大家握手一刻仲非常感動呀。

而 李佳 一樣話自己心情激動， 龍婷 則話今次表演發現咗好多個唔同嘅自己，仲話自己呢晚表演時非常釋放自己呀，其中 梁浩銓 原來仲係帶傷死頂上陣。

除咗26強成員之外，節目主持 車婉婉 亦都係表演者之一，佢呢日更淚灑舞台，又即場獻唱送俾各位參賽者嘅新歌《遲來的加冕》，佢同受訪時仲即場要囝囝BBQ向幫佢作新歌嘅伍仲衡拜師，非常搞笑。

呢兩場表演吸引大班圈中人到場欣賞，而由海選一直見證佢哋到開騷嘅 曾志偉 更加連睇兩場，仲大讚各位嘅表現非常唔錯。而一班參加者嘅家人亦都齊齊喺台下捧場，非常戥經歷半年重新尋找自我嘅家人驕傲呀。

除咗家人之外，唔少因為節目成為Fans嘅歌迷亦都喺場外為佢哋應援， 羅啟豪 仲獲贈由美國空連返港嘅特別版公仔，令佢非常感動呀。