野外步出3玩野加大馬｜Jojo被封勇者乜都敢玩 急流墜河見白光向母道歉

《野外步出3玩野加大馬》最後三集，身兼監製同主持嘅 方紹聰 ，會同Jojo 黃紫恩 挑戰自我，大玩潛水、越野車、滑翔傘等極限運動。星期三一集，奶仔同Jojo會大玩激流橡皮艇，仲幾乎翻艇遇險。

佢哋試玩激流位於沙巴嘅巴達斯河(Padas River)，奶仔同Jojo同攝製隊一齊接受教練Andrey 簡單訓練同講解後上船體驗。當抵達一個名為Head Hunter Rapid嘅激流時 整艘船被拋起，除咗船尾嘅教練之外，所有人全部被拋落水，仲隨住水流一直往下游沖，情況危急；經歷幾分鐘漂浮後水流開始減慢，各人最終成功脫險。

之後奶仔同Jojo講返呢次經歷都猶有餘悸，Jojo開始時仲非常自信寸嘴︰「我唔識死同教練講，又話反艇嘅？反艇先好玩。點知講完10秒架艇就反咗， 喺船底唞唔到氣，以為自己『要走』，每次上水唞氣都畀船底頂住。」

喺水底掙扎期間，Jojo心底不停呼喊「媽咪我對你唔住」，仲話一度見到白光，以為自己會死，幸好最後有驚無險。而奶仔就透露跌落水一刻完全不分上下，更指當時內心第一想法係擔 心同行工作人員安危。

至於星期一晚播出一集，有J2er第一勇者之稱嘅Jojo，玩水上拖傘時表現神勇，當拖傘隨快艇加速愈升愈高時，佢仲大叫「higher、faster」。雖然Jojo大無畏，不過玩香蕉船時就遇上大浪整個人被拋落海，唔止左眼皮被割傷流血，仲被海上的水母猛 「炸」雙手，搞到一片紅腫。

製作組見狀叫停拍攝，急速回航為Jojo療傷，但係其間勇者Jojo表現鎮定，治理期間仲有講有笑，不愧為女漢子。奶仔憶述指Jojo處理傷口期間，一再透露表示希望繼續拍攝，令奶仔非常敬佩，奶仔仲話：「佢真係勇猛又專業。」

《野外步出3玩野加大馬》 最後三集 22:30 J2