趁而家去東京偷食...譜！｜陳若思胡美貽東京偷食譜 深入廚房禁地偷師開眼界

由陳若思(Amber)、胡美貽(Nicole)主持嘅《趁而家去東京偷食...譜！》星期一起首播，8集節目中會為觀眾介紹唔同日本美食嘅隱世製作方法。Amber同Nicole仲分別化身「歡樂小姐」同「資訊擔當」，為觀眾闖入日本廚房禁地，揭開背後神聖同神秘面紗。

節目中的美食賣相精美、色香「美」俱備，隔住個Mon都流口水。首集打頭陣出擊嘅鰻魚飯，原來分「蒸燒」同「地燒」兩種，視乎食材屬河鰻定海鰻(青鰻)而定。Amber同Nicole先拜訪主打蒸燒嘅鰻魚店，Amber率先發揮「歡樂小姐」本色，試食軟熟嘅燒鰻魚肝時竟話︰「好少食到魚肝係咁軟囉……」身為「資訊擔當」Nicole即時更正，而Amber就自爆︰「我可能以為係雞泡『魚乾』。」

之後佢哋再去到另一間主打地燒海鰻嘅專門店，原來地燒適合烹調肌肉結實嘅海鰻。除咗試食，佢哋亦走入廚房拜師學藝，可惜第一個串鰻魚動作已險告失敗。Amber受訪時，講到今次東京之旅最大收穫時話︰「係學曉包飯團嘅手握法，依家拿捏得好好，可以包畀其他J2ers食。」

佢又透露曾上過烹飪課，平時會整菠蘿咕嚕肉同避風塘炒蟹，仲經常親手為朋友炮製生日蛋糕。佢仲話今次出發去日本嘅工作人員，大部份曾喺《港女野人》時合作過，所以特別愉快。至於Nicole就話可以一探日本人廚房感覺興奮︰「其實要入日本餐廳嘅廚房唔係咁易，平時亦好少公開接受採訪，所以製作組係花咗好多時間周旋同安排，好多謝佢哋先有今次咁特別嘅體驗。日本人嘅廚房好整齊、好企理，衛生非常好。」

Nicole仲話最大得着係學識炸豬扒做法，最緊要係事先打鬆豬扒同用新鮮麵包糠︰「我有諗過喺香港買啲靚叉燒攞去炸，然後再加啲甜豉油喼汁，有信心9成似。」 偷完鰻魚飯食譜，佢 哋之後仲會拜訪曾贏得全國最高金賞獎嘅炸雞店、「幸福炸豬扒飯」、「拖羅級」牛腸鍋同學整飯糰。記得跟住佢哋一齊《趁而家去東京偷食...譜！》喇。

《趁而家去東京偷食...譜！》5月22號起 星期一至五晚 20:30 J2