伍富橋羨慕周吉佩有仔女撐場 羅毓儀預告下月推出日系搖滾新歌

伍富橋羨慕周吉佩有仔女撐場 羅毓儀預告下月推出日系搖滾新歌

周吉佩喺《中年好聲音》奪冠後,呢日同吳業坤、Alvin伍富橋、羅毓儀、林沚羿、Aster劉芷君出席音樂巡禮活動。吉吉席上首次獻唱新歌《你是我唯一的》,吉吉話首歌都係早幾日前先收到份歌詞,仲未正式錄製就率先喺活動上獻唱,所以吉吉話呢日表現嘅心情,仲緊張過當日決賽嗰陣呀。

呢日劉芷君、林沚羿、坤哥同Alvin都分別獻唱新歌,當Alvin見到吉吉一對仔女同太太喺店下幫吉吉打氣時,就令Alvin相當羨慕,仲即時向吉吉請教育兒經,但就畀大家誤會Alvin已經做人成功,令佢要急急澄清呀!

講到第一首個人單曲係sweet爆嘅情歌,現年15歲嘅Aster就話錄嘅時候好靠幻想,諗住如果自己鍾意嘅男仔都鍾意返自己會係點。佢又話聽到同場嘉賓喺台上分享戀愛經歷時,令到自己都對戀愛有所憧憬,仲話覺得戀愛可以令人心情開心係好事,不過而家自己就要兼顧學習先。而首次Live演繹新歌嘅林沚羿,就話自己心情相當緊張呀。雖然呢日羅毓儀未有獻聲,但佢就透露下月幾會推出日系搖滾feel嘅新歌,仲話到時仲會拍片教fans新歌入面句日文係點唱呀!

麥明詩盛勁為舉辦婚宴 林作媽媽現身送祝福

麥明詩同盛勁為喺3月24號擺酒舉行婚宴,獲馮盈盈、鄭衍峰、同麥大力擔任兄弟姊妹團,一對新人甜蜜咀嘴,幸福滿瀉,Louisa喺結婚過程中多次開心到喊,好多朋友更祝福佢哋早生貴子,佢哋都話有呢個計劃,仲話會趁婚假養精蓄銳為生BB做足準備。

而呢晚劉佩玥、吳業坤、江美儀、陳庭欣、戴祖儀、郭子豪、鄧卓殷、丁子朗、洪永城、唐詩詠、黃德斌、翁嘉穗同老公都有到賀,但最驚喜嘅莫過於係Louisa舊愛林作嘅媽媽王莉妮現身,原來佢係以Louisa契媽身份送上祝賀,佢更大讚盛勁為好靚仔好型,自己個仔完全比下去,林媽媽仲話覺得好可惜,之前一直好想阿仔箍煲,最終事與願違。不過林媽媽阿仔都有託佢向Louisa送上祝福。

林作同裕美日前post出結婚相,問到林媽媽囝囝係咪都好事近?林媽媽竟然話林作影婚照係因為受到刺激,仲話自己安慰阿仔叫佢睇開啲,至於講到會畀裕美呢個準新抱幾多分?林媽媽似有難言之隱,只係話佢合格咋。

盈盈見證住好姊妹Louisa覓得真愛都好戥對方開心,佢仲話喺一對新人之間嘅互動,已經感受到佢哋係有幾恩愛,佢仲大讚兩人係最佳拍檔。至於兄弟之一嘅麥大力,之前喺美國滑雪傷腳,雖然仲要撐住拐杖,但大力都堅持上陣,認真唔話得,而Leonard就分享咗兩人相處嘅小趣事。

而啱啱再榮升做爸爸嘅洪永城,就再次同大家分享喜悅,佢仲話細女似媽咪多啲,而大女見到妹妹都好開心,仲鍚咗妹妹一啖添。

 相關推薦

熱門搜尋