最近一集《思家大戰》由「一舞傾城隊」姚子羚、蔡潔、陳星妤、莊鍶敏及莊思明，擊敗觀眾隊「my gym girl」，成功攞走最終大獎，一班美女果然係美貌與智慧並重。

蔡潔喺「開口中」環節語出驚人，指女人最怕特別大嘅身體部位係胸部，令隊友及現場觀眾都有啲驚訝，蔡潔受訪時解釋當時腦海一片空白，自言畀錯咗反應，以為係女人最care嘅部位！蔡潔嘅逆向思維作答鬧出不少笑話，好多答案都出乎意料，而莊鍶敏打算用獎金買美食。

由李思捷主持及監製嘅《思家大戰》第三季逢周日晚8點半翡翠台播映，本周日（21號）播出呢集由「媽媽生 Michelle」姚子羚率領「一舞傾城」隊，成員包括「Monica」蔡潔、「KK」陳星妤、「魚旦媽」莊鍶敏及「巴巴拉」莊思明；另一隊則是由家庭觀眾「健美美魔女」賴維茵（Ivy）率領「My gym girl」隊，成員包括Lotto、Eden、晞喬及「HK Gym Girl」楊彥婷。

「一舞傾城」隊，左起：姚子羚、蔡潔、陳星妤、莊鍶敏、莊思明

呢集一開始，主持人李思捷即「記者」上身，向《一舞傾城》飾演「媽媽生」嘅姚子羚攞料，李思捷好奇問佢哋事前點做角色Research，有冇去跳茶舞嘅地方做Part Time，全程表現精靈嘅姚子羚即醒目反擊：「茶舞好多地方式微喇喎！」思捷聞言竟爆大鑊：「（呢啲地方）晶哥就去得多喇！」之後姚子羚按思捷要求戲精上身，化身劇中「媽媽生」表演「拉客嬌俏兩式」—掩嘴笑及搭膊頭：「李老闆，今日第一次嚟到呀，真係啱喇，我哋《思家大戰》嚟咗好靚嘅女女呀！」劇中飾演姚子羚敵對「媽媽生」莊鍶敏亦不遑多讓，拉住打扮性感嘅妺妹思明向子羚示威： 「我呢邊好好，係咪特別少布先？嗰啲包到咁冇服務！」思明則搞笑接招： 「我慣咗畀人彈鐘。」相比之下，「Monica」蔡潔及「KK」陳星妤明顯較怕醜，與其餘三人相映成趣。

「HK Gym Girl」隊，左起：Lotto、Eden、楊彥婷、晞喬、Ivy

這邊廂「一舞」隊盡情「靠把口」搞氣氛，那邊廂「Gym Girl」隊則靠「實力」搞氣氛，五名隊員按思捷要求，向觀眾展示最強一面；其間楊彥婷輕鬆做出一字馬技驚四座，成功搶焦。而51歲「美魔女」隊長 Ivy，不單止樣子keep得年青，連身形fit到爆，出場時成功引發尖叫。

姚子羚逐一介紹隊員出場，個樣好風騷。莊鍶敏就同阿妹思明唱雙簧。

正式遊戲環節亦係高潮迭起，來勢洶洶嘅「一舞」隊，第一條問題已成功清板， 令「My gym girl」苦陷危機；其間莊鍶敏為咗爭勝，不但表情多多，答到興起時更高呼「男人」，遭思捷點名稱讚：「我就係知你性格，講咪講咯！」不過 「Gym Girl」隊並非弱者，好快便板回劣勢、反過來令「一舞」隊身陷險境， 兩隊惡鬥至最後一刻才分出勝負。四條問題中，以「講一樣你會用雙手攬住嘅嘢」引發爭議，最後一個答案更令兩邊費煞思量，答案揭曉後更令全場 「嘩」聲四起。到底咩答案咁震撼？密切留意新一集《思家大戰》。

蔡潔明顯較怕醜。 陳星妤都係好怕醜。莊思明搞笑接招：「我慣咗畀人彈鐘嘅。」 「My gym girl」隊身形弗到漏。「美魔女」Ivy 話自己 51 歲時，全場觀眾都顯得難以置信。「一舞」隊第一條問題已成功清板， 令「My gym girl」苦陷危機。

《思家大戰》第三季逢周日晚八點半翡翠台播映