歌手 洪助昇 轉眼出道一周年，佢嘅Fans日前就為佢舉行舉行小型展覽同聚會慶祝。場內擺放咗唔少Aiden嘅海報、相片、燈牌等唔同應援物，又一直Loop住Aiden嘅歌曲，而主角Aiden亦突然現身會場，令大家都非常驚喜。

Aiden突襲Fans為自己舉行嘅出道紀念活動

Aiden到場後同現場Fans逐一合照同簽名，而fans亦送上寫住「Happy 1st Debut Anniversary Aiden」嘅蛋糕。突然「踩場」嘅Aiden話：「知道佢哋好有心，特別租咗個場地為我慶祝，仲要由19號去到25號七日咁耐，所以都想親身嚟多謝佢哋。」佢又笑言經過新人階段後，染咗新髮色迎接新一年，「多謝大家呢一年嘅陪伴，亦都多謝大家陪我經歷完呢一個新人嘅階段，未來嘅日子希望大家繼續多多指教，我會繼續努力去唱好每一首歌、做好每一個表演，希望大家會同我一齊行往後嘅路。」

Aiden又預告自己嘅新歌即將推出：「新歌講愛情，可以當係《憑實力單身》同埋《生活復常》混合嘅一首歌，故事主題可能近呢首歌、風格方面就近嗰首歌，所以我覺得係一首好值得大家期待、亦好期待大家聽完呢首確嘅感覺。」佢仲預告MV有突破演出：「今次MV有一個幾突破嘅演出，點突破就等大家睇嘅時候錄低嘅反應再share俾我，都幾期待你哋嘅反應，我覺得你哋會嚇親，但係大家記得冷靜。」

洪助昇（Aiden）日前推出全新派台作品講述現代愛情故事，新歌沿用Aiden出道歌曲《憑實力單身》班底，為咗呈現呢種不顧一切嘅愛情，MV導演以「跳崖」方式呈現，有時明知會受傷，但情感會沖昏頭腦，冇好理智分析繼續落去雙方都會受傷，同時冇好好保護自己。

Aiden拍MV連續拍攝24小時，Aiden由早上六點出發，第一場要浸冰水，佢自爆差啲以為自己會猝死：「拍嘅時候一開始好興奮，但拍落去發現身體呃唔到人，拍嗰日好凍，導演又不斷加冰，拍完呢場有一刻發現自己心跳好快，嗰刻好驚自己會猝死，但休息咗一陣就冇事可以繼續拍攝，我都唔係好夠膽俾同事知道，因為佢哋好錫我，一定要我去檢查咗先」。Aiden與好友余潔滢一齊拍MV，二人要用口互餵水，NG七至八次！