熱播劇《一舞傾城》星期一晚一集，劇情講到「萬國城最後一個處女」KK (陳星妤)睇到 Marco( 關楚耀 飾)同Paula( 傅嘉莉 飾)嘅情慾片後大受打擊，更答應下海陪客，KK收到800 萬元支票後內心非常掙扎，既心痛被Marco背叛，但又想媽媽( 袁潔儀 飾)過更好生活，不情不願嘅KK一邊淚崩一邊寬衣解帶，內心不安我見猶憐。

當Marco知道KK賣身後，即趕往酒店找尋，已動真情Marco唔止未嫌棄KK，亦正式向佢示愛：「無論你做咗啲乜嘢都好，我都一樣咁愛你，不如你唔好做呢行， 永遠同我一齊啦！」Marco之後揭露情慾片真相，原來片段由Paula安排偷拍用以向佢勒索，而KK亦因月事來潮守住初夜，最終兩人化解誤會和好如初。

KK因為月事來潮，貞操幸保不失

不過魚旦媽( 莊鍶敏 飾)眼見80萬仲介費凍過水，遂向KK找晦氣，夾埋29組一班小姐捉住KK 虐打，幸好Michelle( 姚子羚 飾)趕到救場，仲葉問上身一打九， 非常厲害。一班女仔打群交，又扯頭髮又互摑再起飛腳，畫面相當震撼。

子羚呢個功架係咪有啲熟口面呢？

尤如《鐵拳英雄》金福妹上身咁嘅子羚，受訪時笑言呢場戲非常難忘：「平時都係同男演員打多，今次難得同女演員打，仲要一個人打咁多個女仔，覺得都幾得意。」講到同女仔拍打戲 嘅難度，佢就話：「女仔打交通常都係扯頭髮、掌摑，好擔心啲位就得唔好同埋無情力會整親大家，拍完之後見到佢哋啲手紅晒，我都好心痛。記得有個動作，我打完莊鍶敏再打莊思明，莊思明要成個人撞埋個櫃度，佢撞完跌落地下我都好緊張，即刻問佢有冇事，好彩最終順利完成。」

其實Michelle嘅真正身份，就係《鐵拳英雄》中嘅金福妹轉世

噚晚另一焦點，絕對係萬國城嘅初戀之夜活動，一班舞小姐齊齊着上校服化身學生妹，當中蔡潔同陳星妤以水手裝校服上陣，純情指數爆晒錶，文凱玲就以運動裝登場夠晒活力；至於一班媽媽生造型同樣搶眼，陳法蓉同姚子羚齊齊化身性感女Miss，戴上眼鏡同以低胸貼身裙上陣，養眼度十足。

呢集初戀之夜主題，一眾女角嘅打扮認真養眼呀

《一舞傾城》星期一至五晚 21:30 翡翠台

TVB熱播劇《一舞傾城》開播一星期即掀起城中熱話，呢日陳法蓉、蔡潔、姚子羚、鄺潔楹、陳星妤、關楚耀、莊鍶敏、傅嘉莉及李嘉等一眾演員一齊出席商場宣傳活動造勢，眾人大玩遊戲，更向現場觀眾送上雪糕。

蔡潔笑指初時睇劇本嗰陣，劇本輕描淡寫啲親密戲份，但係佢哋開工時就好想呈現當年夜總會真實一面畀觀眾睇，好多場口係希望做到好逼真，蔡潔拍親密戲份唔太尷尬，反而陳法蓉同蔡潔異口同聲覺得男演員喺拍攝時較怕醜，擔心被人話係「鹹豬手」。

姚子羚稱李嘉喺劇中演鹹濕佬，原來有一個場口講李嘉摸姚子羚大髀揩油，李嘉全程動作好生硬，陳法蓉爆最終要姚子羚捉住李嘉隻手示意佢要點樣摸；李嘉喺劇中跟莊鍶敏有床戲，佢感謝莊鍶敏帶自己入戲，傅嘉莉則劇透自己將有一場大膽場面。

劇情發展越嚟越緊張，鄺潔楹飾演嘅「細細粒」更有被性虐嘅戲份，佢事前做足功課揣摩角色，港姐出身嘅陳星妤雖然第一次拍劇，由於角色經歷坎坷，令佢覺得拍劇好新鮮，同場嘅關楚耀喺「520」呢一日宣布跟拍拖6年嘅女友求婚成功，原來呢個浪漫時刻係發生喺今年2月，關楚耀分享喺曼谷求婚過程，揀「520」先講，覺得夠晒浪漫！