黃妍與林奕匡呢日出席一個有關版權意識宣傳活動擔任嘉賓，抱病在身嘅黃妍全程戴住口罩，佢哋除咗喺台上獻唱，黃妍與林奕匡仲分享作為創作歌手寫歌時嘅小顧慮。

黃妍坦言最怕自己聽歌喜好影響咗作品被誤會「抄歌」，而林奕匡覺得近年多咗人講AI創作，佢知道要有人創作先可以有版權，到底AI創作點去管制，未來AI創作要點樣絕對要留意；講到有43年歷史嘅音樂節目《勁歌金曲》日前播完最後一集，黃妍覺得好惋惜，勾起二人參與呢個節目嘅難忘點滴。

由 冼靖峰 同潘靜文 主持嘅TVB全新音樂節目《J Music》6月初就會正式首播，呢日 林奕匡 同 葉巧琳 為其中一集錄影，仲喺Live Band伴奏下一齊合唱呀。Phil就對今次新形式節目非常滿意，而可以同唔同歌手合作就更有火花，仲話6月就會推出自己嘅新歌喇。

而Mischa就指除咗自己嘅新歌之外，好快就會演出音樂劇，仲叫大家期待同留意呀。佢仲話近日行山Keep Fit，為近日就要迎接嘅一個大挑戰有關，仲話早前開騷後一直未有管理身材，目前體重係人生顛峰，所以一定要好好努力呀。