酒國仙女林明禎代言手工啤酒 豪言若飲醉要裸身沙灘日光浴

天時暑熱，唔少朋友都鍾意飲返兩啖啤酒消暑，而大馬女神 林明禎 就因為甜美可愛兼爽朗貼地，最近又有新客戶邀請，為一個手工啤酒品牌拍攝廣告喇。

明禎喺宣傳片中半露香肩，靚女又好身材嘅佢，平時經常受到唔少注目禮，呢次佢就以冷豔眼神定睛注視觀眾仲問：「睥咩睥？」期間佢又以娃娃音廣東話講對白，加上甜到漏嘅笑容，就算講錯對白NG不自覺扁咀，可愛到幾乎電暈負責拍攝嘅攝影師呀。

明禎不時被讚有仙氣，但係原來佢仲係女中豪傑，佢話：「坦白講，我從來無飲醉過，所以我都好想知我飲醉咗係咩樣。如果我飲醉咗可以變成男仔，我第一件事應該會除衫，攞支啤酒跑去海邊曬太陽。」

佢仲透露疫情期間，每次往來唔同地方工作需要隔離，林媽媽日日都會問佢有冇飲酒，因為林媽媽認為酒精可以殺菌、消毒，非常有趣。擁有22吋纖腰嘅明禎，散發健康性感魅力，原來好身型同飲食習慣有關：「我原本係想要環保，所以食少啲肉，我嘅身體、體態，我都覺得變得好好，唔止可以環保，自己都可以變得更加好。嘩，有押韻！」