AGA 江海迦 3月推出新作《MIZU》，久休復出嘅佢新歌MV亦特意到日本取景，同大家一齊穿梭於澀谷街頭同過百年歷史嘅傳統歌舞伎舞台。日前《MIZU》喺影片分享平台嘅點擊仲已經突破100萬次喇。
 
對新歌成績理想，AGA同團隊都非常振奮，所以即時同監製舒文仲有編曲嘅波多野裕介重新改編《MIZU》製作一個Acoustic版本，以答謝歌迷支持。早前嘅《MIZU》展覽中，除咗展出MV中特色戲服之外，AGA同歌迷亦一齊製作香薰蠟燭，當時就有歌迷問到會唔會推出不同版本。而新推出嘅Acoustic版編曲以鋼琴為主軸，大家細味琴聲編排仲會發現當中巧思。
 
AGA亦非常感激樂迷對新歌嘅支持，佢話：「《MIZU》係我嘗試新音樂風格嘅作品，有呢個好成績我同團隊都好開心。多謝大家支持！我會繼續做更多好作品答謝大家！」

資深藝人溫裕紅(Esther)於5月19日安詳離世，終年54歲。溫裕紅早年主持婦女節目《都市閒情》，同時亦有參與劇集演出，曾效力無綫23年，早前播出嘅《食腦喪B》為佢嘅告別作。

溫裕紅喪禮於下月中設靈，翌日舉行安息禮拜，上午11時隨即出殯，靈柩奉移火葬場火化。

溫裕紅於2005年不幸確診患上乳癌，當時已經擴散到淋巴，不過一直積極樂觀抗癌，接受化療時要剃頭同包頭巾，後來醫生建議佢做手術將乳房切除，幸病情終於能夠控制。鄧萃雯其後為佢介紹整形醫生接受重整乳房，朋友林淑敏2010年患上乳癌，溫裕紅以過來人身份全程陪伴她度過艱難的日子，二人成為好姊妹。溫裕紅曾於2020年受訪時透露，自己身體情況好好，唔需要再服藥，只需每年做定期身體檢查。

不過與佢相熟嘅 韓馬利 就指，知悉Esther近年癌症有復發情況，但係佢依然不時同朋友見面，而近月情況亦轉趨嚴重，佢指目前喪禮後事由教會同胞姐協助處理。

自從溫裕紅離巢後，生活過得非常低調，閒時會相約朋友行山。林建明於2022年曾與溫裕紅飯聚，見溫裕紅戴上頭巾且身形消瘦。

溫裕紅早於中學年代一直玩話劇，畢業後報讀演藝學院，後來面試成功被TVB取錄成為無綫藝員。溫裕紅在TVB多年拍近百部電視劇，如《巴不得媽媽...》飾演男性化「魯玉芬」、《仁心解碼II》飾演黎繼鵬太太、《降魔的2.0》飾演「啤啤」媽媽，《BB來了》演李佳芯女強人上司Bianca，角色令人印象深刻，得到觀眾讚賞。