肥媽李鼎丨肥媽感謝林嶺東知遇之恩 鼎爺感激珍姐全方位力薦

由肥媽、鼎爺同游嘉欣主持嘅飲食節目《肥媽李鼎》嚟到最後一集，今集主題係「最多謝的人」。肥媽話最想多謝已故林嶺東導對自己嘅知遇之恩，佢話當年自己喺一間Disco唱歌，而林導就成日嚟捧場，肥媽憶述：「佢覺得我把聲似黑人，之後叫泰迪羅賓作咗首黑人怨曲畀我唱，點知一唱周街啲人叫我 『嘥氣』，咁就入咗呢行。」肥媽分享同林導嘅趣事，佢說：「佢嗰時晚晚嚟好似返學咁，我每晚都會唱《We Are The World》，呢隻叫校歌，我就叫校長， 嗰時好好玩，真係唔捨得。」

而鼎爺就指非常多謝珍姐曾勵珍，因為對方由自己做藝員到轉做烹飪主持，對方都係極力推薦自己，鼎爺仲話即使自己有天大本事，但如果冇人畀機會都係冇用。鼎爺又講返當年拍攝節目《阿爺廚房》時，前後經歷咗三次試廠：「真係試到我忟，覺得我眼神惡同聲氣大，前前後後試咗三次，其實佢都好重視，如果唔係都唔會嘥錢試你呢個傻佬啦。」之後鼎爺仲即場模仿珍姐招牌動作「睇吓點」，喺隔離嘅游游睇到即讚好神似。

至於游游最想多謝嘅人，就係搵佢拍劇集《香港愛情故事》嘅監製林肯，游游話：「我當時真係一個𡃁妹乜都唔識，佢夠膽畀一個重要嘅角色我做，佢真係好夠薑，如果冇佢當初咁大膽選用我，就冇今日我坐喺度同兩位講嘢。」之後肥媽畀機會游游對住鏡頭向珍姐推介自己，游游竟然怕醜到面都紅埋。嚟到節目尾聲，身為廚房Killer嘅游游為答謝肥媽同鼎爺嘅照顧，非常有心地提早到場炮製「游氏釀冬瓜」慰藉兩老。

另外，肥媽自爆早年曾畀人屈過檔亞視，令佢無份參演大騷導致收入大減，後來肥媽索性疊埋心水做生意，佢說：「其實我要多謝佢，如果冇佢，我都唔會開咗 18 間卡啦 OK 同有 Live Band 唱歌嘅地方。」肥媽透露呢個屈佢嘅人係好出名，大家都認識嘅，想知道更多細節？記得留意收睇喇！

《肥媽李鼎》最後一集 24號 22:30 翡翠台