法言人祝捷會丨馬明爆劇中浪漫情節由林夏薇操刀 黃嘉樂指太太對自己零嘴戲感失望

法言人祝捷會丨馬明爆劇中浪漫情節由林夏薇操刀 黃嘉樂指太太對自己零嘴戲感失望

劇集《法言人》雖然已經休庭大結局,但係觀眾們都好唔捨得劇中班演員,呢日馬國明、張頴康、蔣祖曼、黃嘉樂同趙璧渝等就舉行祝捷會。

馬明同林夏薇呢對「金田CP」深受觀眾歡迎,馬明話劇中唔少浪漫情節都係由薇薇操刀構思,好似劇中佢哋拎熊仔嗰一幕,就係由薇薇加上去。講到現實中馬明同未婚妻湯洛雯都有馬仔同獨角獸公仔,馬明即時甜笑,就話呢個idea係自己諗嘅,仲話呢個做法都幾浪漫呀。

資深演員溫裕紅日前不敵癌魔離世,曾經同對方合作過嘅馬明,表示收到消息都好難過,仲話咁嗰計較咁為後輩好嘅前輩已經越嚟越少,所以大家要好好珍惜呀!

嘉樂同璧渝喺劇中都收成正果,現實中嘉樂就話太太都有捧場睇劇,但就成日問點解劇中佢同璧渝冇嘴戲,嘉樂話太太咁問並唔係呷醋,而係太太好想睇呀!璧渝亦表示黃太有喺社交平台tag自己,佢仲慶幸黃太冇因為咁而呷醋。

而Joman同張頴康就話好期待可以有續集,除咗想睇多啲唔同嘅案件外,仲想睇到佢哋喺劇中湊小朋友嘅戲份呀!

逆天奇案2|金牌監製劉家豪率眾演員為榮休作宣傳 劉佩玥向觀眾拋線索破身份之謎

TVB新劇《逆天奇案2》即將喺下周一(1號)晚8點半首播,宣布7月榮休嘅金牌監製劉家豪率領陳展鵬、馮盈盈、黃智賢、蔣祖曼、張頴康及劉佩玥(Moon)等一眾演員現身商場進行宣傳。《逆天奇案》收視叫好叫座,所以將《逆天2》視為收山作嘅家豪哥好有壓力,仲話繼承上輯精神,扭盡六壬令觀眾追住睇。展鵬透露劇情將更加精彩,節奏仍然緊湊刺激。

家豪哥入行多年創作過唔少經典作品,即將要退下火線,當然會有不捨心情。所以家豪哥都話一家四口呢次會喺劇中出現以作紀念。家豪哥更喺結局埋下彩蛋,預告林夏薇嘅一句對白係自己向天下有情人講嘅一句話添!

至於講到退休生活,家豪哥就會同老婆梅小青展開郵輪旅行渡假,佢哋因唔捨得一對孫仔,所以佢哋決定分段式旅行,家豪哥亦期待日後弄孫為樂嘅生活。

阿Moon同張頴康呢對反派夫妻喺上一輯收穫唔少觀眾喜愛,雖然阿Moon角色已經死咗,但係佢呢次仍會參與演出。而阿Moon亦向觀眾大拋線索,叫大家用第一輯海報同第二輯做對比,喺眼神同服飾上可以搵到解謎答案。蔣祖曼同黃智賢雖然繼續做一對,但二人感情就遇到唔少危機,更有「最強第三者」出現!

《逆天奇案2》周一至五晚8點半翡翠台播出

 相關推薦

熱門搜尋