近日頻頻出現為傳記式電影宣傳嘅 溫碧霞 呢日同 陳妍希 董璇 穎兒 等女星齊齊盛裝打扮現身一個喺澳門舉行嘅活動，Irene喺其他同場嘉賓面前依然唔覺有歲月痕跡，而佢本人就指保持年輕最重要就係保有童心呀。

而陳妍希就分享細個第一次戴珠寶嘅有趣故事，佢話當時喺屋企偷戴媽咪嘅首飾，仲搞到唔見咗一隻鑽石耳環，搞到佢覺得非常內疚呀。而離婚後一直投入工作嘅董璇就拍攝不斷，至於早前喺網上發佈剪髮短片嘅穎兒，呢日就公開話係為咗角色而狠心剪短將留有20年嘅秀髮呀。

馬國明同湯洛雯今年初公佈訂婚，二人一直未有透露婚期，呢日一對準新人甜蜜出席一間珠寶店開幕活動，亦係馬明同靚湯宣布婚訊後首次一齊出席公開活動，獲大會送贈一對名貴龍鳳金鈪。

馬明當眾讚靚湯任何時候都好靚，令靚湯冧爆，靚湯透露仍未準備婚禮首飾，今次順便揀埋，但係靚湯同馬明唔想講婚期及婚禮地點，拒講兄弟姊妹團隊陣容，靚湯為咗影婚紗相更靚，積極減肥，呢日一身貼身露肩連身裙，可見靚湯減肥成效！