黃夏蕙潘炳烈賀珊瑚婚 丁羽叔自爆曾對夏蕙BB心動

黃夏蕙潘炳烈賀珊瑚婚 丁羽叔自爆曾對夏蕙BB心動

見到黃夏蕙呢身婚紗造型,唔好誤會佢係要去上頭注香呀!呢日真係夏蕙BB同老公潘炳烈嘅結婚35週年紀念!佢哋仲大排筵席宴請一眾親朋好友嚟見證佢哋嘅開心時刻,出席嘅包括薛家燕、丁羽及劉錫賢等,場面非常熱鬧。

對於結果35年嚟,都可以keep住同老公咁恩愛,夏蕙BB就話只要唔嗌交就得,佢又話老公係個浪漫嘅人,平時會買小禮物氹自己,又會出其不意帶佢周圍去拍拖,相當sweet呀!而見證住潘Sir周夏蕙BB愛情萌芽嘅劉錫賢,就話潘Sir氹對方更勁嘅一招,就係揸住架老爺車載夏蕙BB去遊車河喇!

家燕姐就話見到潘Sir周夏蕙BB咁多年都咁恩愛,好戥對方開心,又讃夏蕙BB對朋友相當真心,家燕姐笑言見到着住婚紗現身嘅夏蕙BB,就好似一個準新娘咁,所以祝對方甜甜蜜蜜、永結同心呀。

至於同夏蕙BB識於微時嘅丁羽叔,就指對方年青時係女神級別,仲有唔少追求者,連自己都曾經心動過呀!丁羽叔又讃夏蕙BB唔只靚到冇得頂,對朋友又有俠義心腸,做人又有善心,所以夏蕙BB先會有咁多好友呀!

薛家燕獲電台同事賀74歲大壽 生日願望心急兩女兒有著落

今個月底30號就係 薛家燕 74歲大壽,家燕姐向來人緣廣,呢日佢返電台開咪時,一眾同事就搞咗個小派對為佢提早慶生,仲獲得多位高層親臨祝賀,大家唔止送上鮮花同手製蛋糕,仲送上印有家燕姐肖像嘅4張J字啤牌,寓意家燕姐得到一手好牌,得心應手,氹得家燕姐又開心又感動。

家燕姐感激同事送上嘅心意,特別係 馬浚偉 嘅悉心安排,令佢最感動係生日卡上收集咗所有同事嘅簽名,佢會將呢張卡好好保存。家燕姐話每年電台都會為佢舉行大型生日會,延開幾十圍好熱鬧,但礙於今年工作密麻麻,決定延遲到五月初才舉行生日會,屆時仲會同天下母親一齊預祝埋母親節。

至於正日生日,家燕姐就會同屋企人出埠到韓國度假,生日願望係「香港經濟復甦,人人有工開,最緊要身體健康,可以享受人生。」另一個生日願望家燕姐就好着緊兩個女兒嘅感情狀況,坦言希望有好消息。一直流傳家燕姐有位Honey喺身邊,講到今次韓國之旅會唔會與Honey同行?家燕姐就好搞笑話:「唔知道,等阿女安排,睇吓邊個Honey鍾意食韓國嘢啦。」

 相關推薦

熱門搜尋