一舞傾城丨陳法蓉忠告陳星妤提防揾食渣男勿「沉船」 楊明一Shot落拍打戲打足7粒鐘

TVB熱播劇《一舞傾城》逢周一至 五晚九點半翡翠台播映。噚晚（24號）播出呢集劇情講到細細粒（鄺潔楹飾）有感連累 Money（文凱玲飾）欠下周身債，遂答應陪練馬師上船過夜幫手還債，怎料練馬師有鋪SM癮，被綁喺床上嘅細細粒慘遭練馬師蹂躪，最終導致遍體鱗傷。

另一焦點就係天真嘅KK（ 陳星妤飾）原本仲以為夜場有真愛，後來發現Marco（關楚耀飾）係有婦之夫，陳法蓉見陳星妤「沉船」似乎對Marco付出真感情，提醒陳星妤要小心，當男人得手玩膩就係另一回事，今晚講萬國城舉行「夜之女神」競選，Marco對陳星妤「表白」，更願意供養佢 ，坦言與太太不相愛，只係生意婚姻，最開心係同陳星妤一起，對陳星妤係認真，究竟KK最終會唔會抽身唔再糾纏！？

今晚一集重頭戲有楊明一個打十個嘅精彩動作戲，以及與姚子羚激吻場口。講到與子羚拍咀嘴戲，楊明本身同子羚本身好Friend，所以佢哋拍咀戲完全冇尷尬， 原本以為只係好簡單嘅鏡頭，點知拍攝時導演要一個360度嘅Shot，拍完順時針之後再要拍埋逆時針，第一次接觸呢個拍攝方法，呢個鏡頭都拍咗好幾分鐘。」
 

講到一個打十個的大型動作場口，楊明指呢場係佢成套劇第一日拍嘅動作場 口，武術指導陳中泰安排咗一Shot落、連續打十幾個嘅鏡頭，因為一Shot落，所以有咩甩漏就要重新拍過，楊明記得拍咗成十幾個 take，差唔多成六、七個 鐘，個停車場又好焗，真係由頭濕到落腳，嗰日係比較辛苦同吃力。」提到劇中有不少動作場口，楊明說：「睇到劇本時都已經知道有好多動作場口，所以喺 21 日隔離期間都有喺房keep住做運動，務求保持最佳狀態。」

《一舞傾城》逢周一至五晚9點半翡翠台播映