捱慣眼瞓嘅夜貓族，將會喺全新節目《我要瞓鬥》入面，挑戰60小時唔夠瞓嘅情況下，接受各種考驗，嚟贏取至少10萬元嘅獎金獎品。

為節目擔任主持嘅曾比特、糖妹、陸浩明同陳葦璇呢日就現身拜神儀式。主持經驗豐富嘅6號，直言今次開完會見到份節目rundown自己都驚，因為流種好多，6號話係自己入行以嚟最難最複雜、最有挑戰性嘅一次。由於今次節目係要60個鐘不停咁拍，所以到時Mike同6號會做夜更主持，而糖妹同葦璇就做早更。首次做主持嘅Mike笑言因為要通頂嘅關係，所以擔心自己皮膚會變差呀。

講到節目要捱晚瞓，四位主持都有唔同嘅「通頂」秘笈，講講下大家仲起哄叫葦璇不如喺節目入面教跳舞嚟令佢哋保持清醒呀。

慈善籌款節目《萬眾同心公益金》6月3號晚圓滿結束，多位嘉賓為慈善落力表演，好似 炎明熹 《中年好聲音》嘅 周吉佩 李佳 龍婷 羅啟豪 顏志恒 吳大強 等，加埋 陳美齡 譚嘉儀 曾比特 朱主愛 余宗遙 鍾柔美 ，而近年甚少公開演出嘅 張德蘭 呢日亦罕有登台為慈善出力，仲話非常留意《聲夢》同《好聲音》參賽者嘅演出呀。

呢日唔少參與歌手都把握機會同佢合照，當中梗係唔少得Gigi啦，而Gigi仲大爆平時極少同藝人合照嘅姑丈，呢日都公開要求集郵，Gigi仲笑返怕醜姑丈轉頭呀。

Yumi好快就會踏入中學最後一年，近日正埋首溫習考試嘅佢，就話已經開始對來年嘅DSE感到緊張，仲話會好好安排時間準備，不過大家亦唔使擔心，因為佢同Gigi都好快會有新歌推出喇。

早前往美國登台開騷嘅 許志安 呢日都係表演嘉賓之一，佢亦現場獻唱新歌，受訪時亦提到重訪一廠見到現場觀眾令自己憶起當年，又指即將會喺新加坡開騷，亦正籌備香港嘅表演，不過估計就要出年先可以成事喇。

《中年好聲音》嘅幾位成員呢晚由過去嘅觀眾變成表演者，佢哋都覺得非常開心，仲話感覺非常有趣呀。羅啟豪呢晚就再同媽咪同台演出，不過羅媽媽就話非常緊張喇。龍婷同李佳呢晚亦大展歌喉，不過去到後台就變成小Fans同各位前輩見面合照喇。

新時代歌手阿Mike亦都同朱主愛仲有余宗遙合作，仲爆不時狂Loop朱主愛嘅網絡神曲咁話呀。