譚詠麟任鄭國江作品展頭場嘉賓 劉松仁李佳現身撐場

譚詠麟任鄭國江作品展頭場嘉賓 劉松仁李佳現身撐場

資深填詞人鄭國江四場作品展正式開鑼,入行超過50年嘅鄭老師,經典作品無數,頭先有譚詠麟、區瑞強、李思捷、李龍基及葉振棠等擔任嘉賓,劉松仁同李佳等亦現身撐場。

譚詠麟一連獻唱多首金曲《誰可改變》及《小風波》等,區瑞強由出道以來唱過唔少鄭老師嘅作品,好多謝鄭老師當年寫咗《陌上歸人》畀佢唱;鄭國江向一眾嘉賓致謝,更預告即將現身嘅歌手名單!

王梓軒相隔四年再演利瑪竇 作客電台節目唱意大利文歌

由 王梓軒 主演嘅音樂劇《利瑪竇》相隔四年後,即將展開第三度公演。劇中飾演利瑪竇嘅王梓軒同之前兩次都有份演出嘅何洋,仲有新加入嘅Marco一同現身薛家燕、范振锋同思敏嘅電台節目,細談今次演出準備同感受。

王梓軒將會再次登台第三度演出《利瑪竇》
 
舞台劇由2014年已開始籌備,並由松哥劉松仁策劃並擔任總監製,梓軒回憶當時松哥搵佢幫手,同佢講有個故事好想做成舞台劇,但又唔係好識。當梓軒聽到松哥問:「可不可以免費幫手做個戲」時亦驚咗一跳,梓軒就話:「松哥叫到,我收你錢咩?應該係我請你食飯,你比機會我。」而初公演嘅時候,松哥亦好擔心會冇咁多人睇,直到而家越做越好真係一個奇蹟。

梓軒形容自己同松哥係二人亦師亦友關係,佢喺松哥身上學到好多演戲方法,松哥嘅高要求更令佢喺演技上得到突破:「松哥排練前曾經好嚴厲對我講,我初初識你嘅時候,你嘅演技喺第一階段,所有嘅情感都係真嘅,但當你進入咗《利瑪竇》劇組,多咗人同你一齊磨練,你慢慢學識咗演戲嘅技巧,但我唔鍾意睇技巧,所以我希望你盡快進入第三階段,就係有技巧,但我見唔到。」令有豐富戲劇經驗嘅家燕姐都話好高難度!

呢日佢同何洋(右二)、Marco(左二)接受電台訪問
 
講到今次公演規格升級,梓軒就透露到時唔止有管弘樂團伴奏,仲會有100人合唱團。當全體人員在台上演出時,感覺好感動。而梓軒更專誠同何洋及Marco喺節目中即場清唱劇中一段意大利文歌,梓軒話:「我地喺劇中冇合唱,為咗家燕姐今日訪問專誠練習合唱一段。」家燕姐都大讚梓軒意大利文好,梓軒解釋讀大學時學意大利文,覺得好浪漫,不過畢業一段長時間都有少少唔記得。
 
作為新加入嘅Marco表示自己係團隊當中比較細嘅一個,因為遲咗一星期先入組,見到大家已準備好,但佢仲睇緊劇本,所以排戲時十分緊張。

 相關推薦

熱門搜尋