全新音樂節目輪翻首播 《勁歌金榜》軒公分享英倫行

隨住播映超過40年嘅最後一集《勁歌金曲》-《勁歌43年情‧讓音樂高飛》圓滿落幕，翡翠台今晚起將一口氣推出三個全新音樂節目，分別係23:00播出；由 許文軒 擔任主持嘅《勁歌金榜》；29號(星期一)起星期一至星期五晚深夜播出嘅《MUSIC BREAK》；以及6月4號起逢星日晚22:30播出；由 冼靖峰 潘靜文 擔任主持嘅《J Music》 。

今晚以新形式打頭陣播出嘅《勁歌金榜》內容豐富，金榜上榜歌曲名單將由原本10首增至20 首，主持Edmond除咗負責報榜外，仲會訪問嚟自唔同地方、音樂界別同年齡層嘅歌手，透過專訪分享音樂大小事，希望能帶出「香港仲有好多高質素音樂」嘅重要信息。

頭炮接受Edmond訪問嘅係 張敬軒 ，唱得之餘亦非常搞笑嘅軒公，除咗會大玩「難題二揀一」，亦會分享創作歌曲靈感來源、踏入40歲後人生觀嘅轉變，同早前喺倫敦開演唱會冋拍攝MV嘅點滴同趣事等。

到可以喺倫敦嘅知名場地Royal Albert Hall舉行演唱會，軒仔坦言對自己嘅音樂生命而言係重要里程碑，佢仲分享完騷後一個感人又勵志嘅小故事：「場館館長特登嚟後台同我哋講，話發現華人觀眾相當好，一件垃圾都冇留低，好有禮貌同好乾淨。」軒仔說畢即滿臉笑容透過鏡頭感謝有前往捧場的觀眾。

而因父母喺旅程中染疫，而要喺當地逗留多一星期，軒公亦分享點解會忽發奇想喺當地拍MV，以及當中所遇到嘅大難題，佢仲提及MV出現嘅旋轉木馬係理想中嘅重要元素，只係過程「得來不易」，佢憶述話：「初初諗住借London Eye，但原來申請批核過程要個半月時間，我等唔切…但我個人就係嗰種『永不放棄同學會』，我覺得所有事情都有解決辦法，我就 Send咗個好長嘅Message畀對方…佢真係覆喎，話幫你諗咗辦法…」到底係咩辦法，記得留意今晚首播嘅《勁歌金榜》喇。

《勁歌金榜》星期六晚 23:00 翡翠台
《MUSIC BREAK》5月29號起 星期一至五深夜 01:35 翡翠台
《J Music》6月4號起 星期日晚 22:30 翡翠台