Celine Dion僵硬人症候群惡化 取消巡演向歌迷承諾：我不會放棄

國際天后Celine Dion憑《鐵達尼號》主題曲《My Heart Will Go On》而紅遍全球，唱過不少膾炙人口嘅金曲，其唱功高強加上氣場強勁，一直穩坐天后寶座，每次開騷均有批歌迷撲飛，Celine Dion去年宣布罹患罕見疾病「僵硬人症候群」，要押後巡迴演唱會，好好休息調理，最近由於病情持續惡化，噚日Celine Dion於社交平台宣布取消2023年及2024年餘下42場巡唱。

「僵硬人症候群」係一種罕見嘅自身免疫運動障礙疾病，影響中樞神經系統，包括大腦及脊髓，肌肉無法放鬆而變得僵硬，患者無法按照慣有方式運用聲帶唱歌，此病屬於罕見疾病，每百萬人中僅約1人得病，通常發病在30歲至60歲之間，此病常被誤診為帕金遜症。

Celine Dion去年12月於社交平台上載一條影片，見佢聲淚俱下向fans致歉，指自己患病無法痊癒亦未沒有特效藥，無法按照原訂計畫舉辦今年2月嘅歐洲巡演，忍痛宣布延期，不少fans表示驚訝，紛紛留言送上祝福。 

噚日Celine Dion再次發文訴說心中嘅無奈，抱歉再度讓fans失望，Celine Dion指繼續推遲演出，對fans不公平，所以佢決定取消巡迴，目前先停下來，直到佢真係準備好再重回舞台，Celine Dion向全球fans作出承諾，「我不會放棄，我迫不及待想再次見到大家」。