楊千嬅巡唱重啟廣州首場自爆瘀事

相隔四年楊千嬅嘅世界巡迴演唱會再次重啟，首站喺廣州舉行，唔少買唔到飛嘅觀眾，都嚟到場館嘅外圍聽演唱會。
千嬅企喺三層樓高嘅吊台登場。
演唱會甫開場，千嬅站喺樓高三層樓嘅吊台登台，並唱出《飛女正傳》、《烈女》、《少女的祈禱》、《可惜我是水瓶座》等多首經典歌曲。千嬅喺台上表示4年前嘅呢個巡演係佢夢想嘅出發點，而家相隔四年再嚟到廣州開騷，當聽到fans嘅尖叫聲，令千嬅笑言：「你嗌到咁悽厲，把聲我好似爭你四年錢咁，不過我好鐘意呢啲聲音呀！」
相隔四年，千嬅嘅巡迴演唱會再次重啟。
現場有歌迷拉橫額應援，不過千嬅見到就搞笑咁話好驚：「依家見到個羊(陽)字都驚呀！作為一個楊(陽)姓女明星，好驚架！」佢仲笑言因為自己曾經確診嘅關係，所以記憶力下降。
千嬅話好掛住大家。
當去到感謝環節，千嬅表示呢晚有70幾位親友嚟咗廣州支持自己：「我個仔話唔畀我提佢，但我都要多謝佢，因為我用了很多時間去準備這個騷，好少有阿媽多謝個仔，但我要感謝佢俾左我好多生活動力，在相處中的人生鼓勵。」之後又多謝老公丁子高支持自己嘅演出。
楊千嬅世界巡迴演唱廣州站。
同觀眾傾得勁開心嘅千嬅，喺台上自爆瘀事，佢話自己喺綵排時唔小心扭親隻手，但係扭傷嘅過程極刁鑽：「點解整親呢？我要試衫舞台服裝，除褲時好緊張，因為趕時間，點知一除隻手指公就撠到隻襪，然後成條筋黐埋，手指公不能屈曲。然後工作人員介紹了一支藥膏給我，搽後好很多。」