劉沛蘅 魏浚笙合作拍廣告 默契十足盼再次合體

劉沛蘅 同 魏浚笙，近日應護膚品牌邀請拍攝全新廣告，佢哋喺現場嘅默契合作加上古靈精怪互動，為廣告生色不少，佢哋亦對今次合作亦相當滿意，Jeffrey仲話：「同家姐(Hillary)拍攝已經好開心，好難有機會聚埋一齊。」 Hillary亦都話：「好鍾意同Jeffrey一齊開工，因為佢好有活力，會令人好開心。」

 
當日拍攝時，Hillary想搶走Jeffrey手上的產品，Jeffrey要不斷躲避，點知就意外撞到旁邊嘅層架，幾乎搞到架上嘅物品釀成「意外」，好在Hillary早已習慣Jeffrey鬼馬百厭性格，反應敏捷幫手接實咋。

默契十足佢哋，仲坦言希望喺唔同範疇合作，Jeffrey話：「我覺得我哋仲可以一齊拍時裝廣告，應該都會幾開心。」Hillary亦都話：「因為大家都鍾意行街買嘢，所以可以合作拍fashion嘢，唔好浪費Jeffrey個靚仔樣，拍飲品食品都唔錯，因為我哋都超級鍾意食嘢。」

樂壇新人Jeffrey最近同天后鄭秀文合唱，外界亦反應不俗，問到佢會唔會亮相Sammi即將舉行嘅演唱會時，Jeffrey就話：「好開心可以同Sammi姐姐合作，亦都嘗試咗從來未試過嘅領域，就係Rap，原來我都可以嘗試呢個方向覺得好開心，至於演唱會，希望有機會啦，就算冇，我都一定會入場支持。」