洪助昇拍MV浸冰水自爆險猝死 與余潔滢互餵水狂NG

洪助昇（Aiden）日前推出全新派台作品講述現代愛情故事，新歌沿用Aiden出道歌曲《憑實力單身》班底，為咗呈現呢種不顧一切嘅愛情，MV導演以「跳崖」方式呈現，有時明知會受傷，但情感會沖昏頭腦，冇好理智分析繼續落去雙方都會受傷，同時冇好好保護自己。

Aiden拍MV連續拍攝24小時，Aiden由早上六點出發，第一場要浸冰水，佢自爆差啲以為自己會猝死：「拍嘅時候一開始好興奮，但拍落去發現身體呃唔到人，拍嗰日好凍，導演又不斷加冰，拍完呢場有一刻發現自己心跳好快，嗰刻好驚自己會猝死，但休息咗一陣就冇事可以繼續拍攝，我都唔係好夠膽俾同事知道，因為佢哋好錫我，一定要我去檢查咗先」。Aiden與好友余潔滢一齊拍MV，二人要用口互餵水，NG七至八次！