好睡好起丨親身測試辦公室午睡惹圍觀 方東昇再爆金句：中年好怕聲音

由無綫新聞及資訊部製作、黃淑明監製、方東昇、黃曉瑩及李曉欣主持節目《好睡好起》，逢周四及周五晚十點半翡翠台播映。 《好睡好起》聽晚（6月1號）播出第三集主題係午睡，三位主持方東昇、黃曉瑩及李曉欣為咗探討午睡有罪定係有益，搵嚟股評人郭思治、體育系學者雷雄德及堪輿學家麥玲玲，分享對午睡看法及自身體驗，仲有教大心理學系副教授劉月瑩傳授「極爽午睡秘笈」。

方東昇團隊走訪幼稚園及中學，直擊唔同年紀學生嘅午睡情況。當中幼稚園學生睡相可愛，童言無忌，大放笑彈。有小男孩「供出」爸爸係家中瞓覺最嘈，主持笑指「出賣爸爸今晚冇飯食」。年紀小小嘅「睡眠特工隊」同樣吸睛，佢哋由幼稚園高年級生組成，負責氹師弟師妹「覺覺豬」，過程有笑有「愛」；至於全場焦點就落喺「舉手誠實男」身上，呢個小男孩有「特異功能」，懂得喺睡夢中答問題，究竟百答百定係答非所問？令採訪團隊笑破肚皮！

今集三位主持將再度化身「白老鼠」，親身體驗辦公室午睡可「眠」。令人意想唔到就係，「金句王」方東昇午睡枕頭相當可愛，黃曉瑩「漢堡包」造型睡枕亦不遑多讓，引來不少同事圍觀、討論，甚至拍照留念。方東昇「午睡」後靈感湧現，再爆金句：「中年好怕聲音」，到底所為何事？密切留意明晚播出的第三集！