隱門丨黃智雯為演好角色修讀心理學課程與岱融哥拍衝突戲冇揸流攤

喺劇集《隱門》入面黃智雯飾演嘅角色心月，除咗要忍受畀飾演親生爸爸葉嘯天嘅吳岱融家暴後，仲要忍受飾演奶奶嘅盧宛茵同飾演老公嘅黃子恆不時冷嘲熱諷，令佢嘅角色經常露出一臉苦情。講到呢次要演繹嘅角色，Mandy笑言壓力爆煲：「呢個角色一直唔可以坦率面對身邊人，身心靈又受到好大壓抑同威脅，其實係好痛苦。自己拍嗰時都放鬆唔到條橡筋，啲幕後話拍嗰時唔敢行埋我度。」
Mandy拍攝時儼如生人勿近。
為咗打得逼真，Mandy表示佢同岱融哥喺拍衝突戲份時都冇特別留力，仲話嗰種逼真感令自己嘅反應更加真實。而為咗準備角色，Mandy專誠上咗一個短期心理學課程：「主要想了解返喺唔健康家庭成長、身心靈受創嘅小朋友，對佢哋日後成長有咩影響。」
Mandy話同岱融拍衝突戲時唔會留手。黃子恆首次演衰老公。仲有盧宛茵演嘅惡婆婆。

至於再做「反派」嘅黃子恆，笑言自己雖然涉獵過多種角色，但好似Mike呢種衰老公角色就你身一次：「唔好話觀眾想打呢個衰老公，我自己睇劇本都覺得呢個人唔抵幫，有啲對白真係幾自私，又孤寒。呢方面編劇係應記一功，好短時間之內用有限嘅對白同劇情，將個角色塑造出嚟。」講到個角色如此不被討好，對白又涼薄，問到子恆演時有冇心理負擔？佢就話自己冇乜顧慮，仲話每套劇每個角色都有唔同功能，最緊要觀眾睇完有反應。

《隱門》星期一至五 20:30 翡翠台