隱門|黃子恒溺斃幻影糾纏Mandy 展鵬型爆跨欄中岱融哥一腳

隱門|黃子恒溺斃幻影糾纏Mandy 展鵬型爆跨欄中岱融哥一腳

《隱門》劇情發展到心月( 黃智雯 飾)嘅愛女晴晴突然暈倒送院,仲被建議換肝續命,「衰老公」阿Mike( 黃子恒 飾)因為怕死而遲遲唔肯驗血,又同心月為此爭吵不休。幾經糾纏之後Mike突然好似良心發現咁決定捐肝,但又突然離奇遇溺身亡,仲化成「幻影」向心月索命:「係你殺死我架!」

自私Mike嘅離奇死亡引發觀眾熱議,大家都競猜「誰是真兇」,男主角子喬( 陳展鵬 飾)、Mandy同葉嘯天( 吳岱融 飾)都榜上有名。而Mandy面對亡夫屍體同亡夫幻影「夾擊」嘅殮房場面,仲因為眼淚同眼神都演出到肉,仲獲讚「冇得頂」。

Mandy面對老公死亡認屍一幕被指非常突出

至於子恒嘅「幻影」造型亦非常搶眼,佢就透露化妝時間唔算長,主要係將面搽白、戴綠色隱形眼鏡,再加上紅色眼線:「之後我都仲會出場,同埋都係Keep住呢個樣,所以要長時間戴住嗰副Con。劇組專登幫我搵咗副質素最好嘅, 特技化妝Con好多時都好硬。」

子恒透露會繼續失驚無神之下現身

子恒續指拍攝時一直同劇組討論將幻影效果拍到最好,最後決定「老是常出現」:「佢會經常喺唔同嘅地方突然出現,都幾纏擾。」 由於劇中角色浸死收場,子恒就透露每次「現身」都要Keep住整濕身扮幻影:「拍嗰陣天氣都幾凍, 我個造型長期都要濕漉漉、滴晒水咁,所以每個Shot都要補啲水,拍嘅時候係凍嘅。」佢又話因為怕嚇親同事,所以每次化妝後即使休息時間都唔敢四圍走。

而噚晚另一重點場口,係陳展鵬為救Mandy,瘋狂跳欄兼街頭飛奔疾走一幕。 花絮片段當中,展鵬一個箭步輕鬆跨過欄杆之餘,緊接完美落地狂奔。可惜完成連串動作展鵬,最終竟被「開車門」考起,皆因要開得有型又要開得及時,先可以同車內嘅Mandy同 吳岱融 夾啱時間演繹。搞笑嘅係, 之前已為傷及對手趙樂賢感到內疚嘅岱融哥,原來呢幕戲又再踢中展鵬,不過見 「旁觀者」Mandy笑開懷,似乎純粹搞笑事一則喇。

暴燥成性嘅岱融哥呢場戲原來爭啲誤傷展鵬

《再見‧枕邊人》結局丨Final Big Boss 揭盅!「暗黑父子情」張國強慈父Tone感染力強

TVB劇《再見‧枕邊人》噚晚(28日)劇情跌宕起伏非常精彩,高潮位一定係晴天(黃智雯飾)與長勝(羅天宇)喺迷你倉檢查小敏(區明妙飾)遺物嗰陣被跟蹤者搶走重要證物,正當觀眾為二人感到肉緊,劇情驚現反轉位揭示「晴勝」原來係故意被跟蹤,一切只係設局引「大凌生」凌頌恆(張國強飾)上當,令小敏被強迫吸毒致死嘅影片透過直播公諸於世。

晴天與長勝到迷你倉檢查小敏遺物,被幪面人搶走重要證物。「晴勝」故意被跟蹤,一切只是設局引「大凌生」上當。小敏被強迫吸毒致死的影片 透過直播公諸於世。

雖然影片影唔到兇手樣貌,由於手上戴藍寶石戒指為「大凌生」標誌性飾物,深知被全城認定係兇手大凌生知道大勢已去後,第一時間係抱住與愛兒Alex(鄭俊弘飾)合照跌坐地上痛哭,並向Alex留下告別口訊:「爹哋唔能夠再陪你,你以後好好地靠自己。」當大家以為大凌生罪有應得,劇情竟再有反轉,原來Alex先係殺死小敏嘅真兇,同時亦係林秀怡劇中死去妹妹嘅兒子Bosco生父!大凌生為保兒子聲譽,背後可謂下咗唔少苦功。

全城直播拍下小敏死亡真相的影片,以及大凌生看到影片時的反應。Alex 與大凌生呢段「暗黑父子情」歪理得好感人。大凌生溺愛兒子 Alex,決定代子頂罪,善美安排 Alex 到美國避風頭,但 Alex 唔肯離開。

今晚(29日)大結局, Alex將終極大暴走,擄走晴天至荒山野嶺進行報復,善美(張曦雯飾)及萬森(馬德鐘飾)先後趕到現場營救晴天,其間萬森與Alex上演連番激戰,同一時間當年謀害晴天嘅Final Big Boss真身終極揭盅,答案絕對令人意想唔到,四人混戰期間,竟然有一人最終墮崖身亡,結局可謂反轉再反轉!

原來 Bosco 生父係 Alex,二人亦早在醫院相遇。Alex係殺死小敏的真兇,同時亦是林秀怡劇中死去妹妹的兒子Bosco生父!

結局周以洋蔥式揭出真相令人驚艷,大凌生與Alex呢段「暗黑父子情」相當吸睛,大凌生喺入獄前專誠拍片畀Alex,以極慈祥父親口脗講出「就算你闖幾多禍都好,我都幫你孭晒」、「就算你一事無成,你都係爹哋最錫嘅仔」。由於大凌生實在講得太感人,Alex流下自責眼淚並爆出自己先係殺區明妙真兇:「我唔……應該戴你隻戒指!我唔應該害死小敏,係我累咗你,對唔住。」劇飾演經常闖禍富二代Alex嘅鄭俊弘(Fred),對於擔演此角直呼過癮,坦承尾段演出難度較高:「要Keep住好崩潰、好緊張、好癲喪嘅狀態,要好快由0去到100,需要好多energy,但呢個角色好好玩。」

晴天今晚將被擄走,再次身陷險境。善美與萬森先後趕到現場,萬森認為善美有份加害晴天。

鄭俊弘以往大多數演乖乖仔,坦言是次演奸角好有得著:「永遠唔可以諗自己係奸,同自己講係好嘅,你就可以好完整同埋justify到你角色所做嘅嘢。」鄭俊弘又指拍攝時兒子鄭讚廷(Asher)出世冇耐,初為人父卻要達宵達旦開劇,只能夠透過視像及家用監控鏡頭與兒子「見面」。
混戰期間有人墮崖身亡,究竟會係邊個?鄭俊弘大結局將終極暴走,值得期待。

 相關推薦

熱門搜尋