周湯豪巡唱高雄站全面升呢 身兼多職導致嚴重睡眠不足

台灣歌手 周湯豪 3場的巡迴演唱會 高雄站 日前於高雄巨蛋開鑼，為咗呢次巡唱，周湯豪唔只換咗全新嘅服飾同更新咗 ⅓ 嘅VCR，舞台設計上仲加入咗互動式螢光棒，令演出全面升呢。

為咗呢次高雄場演出，周湯豪喺一個月前就積極備唱與練舞，唔只戒糖、戒澱粉，佢仲每日健身，令成個body精壯咗唔少。而為咗完美呈現演出，佢連燈光、服裝、舞台走位、VCR設計都撈埋，同製作團隊由朝忙到晚，以至嚴重睡眠不足，喺總彩排時周湯豪笑謂：「我怎麼覺得好像比台北場難了這麼一點點，還是很耗體力、緊張。」

周湯豪日前憑為媽媽比莉製作嘅「比莉卡厲害」首度入圍本屆金曲獎最佳單曲製作人獎，呢次高雄站媽媽比莉亦有到場，佢仲話自己一踏入會場就感動到想哭：「以前從來沒有機會到這樣的場館表演給大家看，尤其又是和兒子一起表演。」

高雄站巡唱將演唱會結合fashion show，以大型LED打造高15米嘅透明造型櫥窗，延伸至「日」字玻璃地坪環繞搖滾區，令現場儼如一個大型party一樣。周湯豪以白色西裝帥氣登場，登上一米高升降舞台演唱出多首歌曲。

至於演唱會內穿插嘅VCR中，則回顧周湯豪出道至今嘅心路歷程，佢感性表示：「很多人等待13年，很多人還沒看到這個秀，接下來我們要去香港，希望可以去很多很多的地方，把我的音樂讓大家看見。」完成高雄場演出後，周湯豪的巡唱下站將於6月24號嚟到香港舉行。