王梓軒藉生日會為fans洗滌心靈 預告向電影監製之路進發

啱啱踏入37歲嘅王梓軒，喺6月3號嘅正日生日同fans一齊慶祝，除咗一齊唱生日歌食蛋糕外，王梓軒仲帶領fans們一齊做瑜珈冥想洗滌心靈，又捐出80件珍藏做慈善拍賣，當中物品包括佢當年出戰內地選秀節目時用嘅木結他。

已經有兩、三年冇喺香港搞生日party嘅王梓軒，話今次生日會嘅idea係嚟自fans，佢話有次同fans傾偈時，對方不知不覺間落淚，原因係因為呢兩、三年大家都過得好不容易，所以先令佢萌生搞呢個生日party。

講到生日願望，佢就話希望工作上有新突破，佢仲透露而家自己朝電影監製嘅方向進發，希望喺2024年可以成真呀，至於音樂上，王梓軒話都計劃緊搞個跨地域嘅Tour呀！