吳君如 同 MC張天賦 日前為新晉導演 何妙祺 執導嘅《我談的那場戀愛》齊齊出席開鏡儀式, 新片係第6屆「首部劇情電影計劃 」專業組嘅獲獎作品,資深演員 吳瑞庭 、以及兩位新演員 陸維德 、 許寶恆 都有出席。開鏡當日雖則面對35度高溫,台前幕後都汗流浹背,不過依然無損大家嘅興奮心情。
君如同MC呢日都以角色造型亮相,飾演充滿時尚感婦科醫生嘅君如,更染一頭金髮上陣,。至於MC就飾演網騙集團騙子,仲以一頭齊蔭素顏現身,非常大反差。君如除咗笑指MC年輕無懼素顏之外。拜神時又「食字」大叫「天賦保佑」,令大家笑不攏嘴。
君如又提到今次終於可以扮演「美女」角色,仲係一名婦科聖手,而MC就偽裝中年喪妻嘅法國籍石油工程師,喺網上向佢詐騙。君如話:「戲中我唔知道佢外表,仲幻想MC嘅角色係佐治古尼咁嘅樣,但後來發現現實係MC,不過一樣覺得唔錯。」
今次原來仲係君如親自向監製推薦MC演出,自言非常欣賞對方MV同舞台上嘅表演,又指身邊極多女性朋友都係MC嘅Fans。君如大讚話:「我去睇佢紅館演唱會,仲記得坐頭排全程兩個鐘抬頭欣賞,但係都聽到我如痴如醉,佢有種好懾人嘅舞台魅力,後來再同佢食飯,感覺佢成個人都好自然,呢套電影角色非佢莫屬。」
獲影后君如加持兼推薦嘅MC,就受寵若驚話:「自己冇考慮太多就接演,始終今次係第2部電影,總之咩角色都想嘗試,多謝君如選中我。」